[A:253]yongs su rdzogs pa du ma zhig brgyud pa'i phreng ba zam ma chad pa las 'ongs pa/ 'khrul pa'i dri ma bral ba rje btsun sa skya pa'i gong ma lnga sogs mkhas grub kyi skyes bu du mas thugs nyams su bstar zhing / 'chad nyan gyi gtan la phab pa'i rgyun dri ma med pa'i dbang bka'/ bshad bka'/ lung bka'/ khrid bka'/ man ngag gi bka' la sogs pa zab cing rgya che ba'i tshul mtha' yas pas phyogs dang ris su ma bcad pa'i snod ldan gyi gdul bya blo gsal zhing don du gnyer ba'i dad 'dun can gzhal du med pa mchog dman 'bring gsum so so'i khams dang / mos pa dang / bag la nyal mkhyen pa'i sgo nas smin cing grol ba'i lam la 'god par mdzad pa'ang / gong du rim pa ltar bshad pa de rnams yin la/ de lta bu'i chos tshul de dag gang 'chad kyang / thos bsam gyis sgro 'dogs legs par bcad cing / bsgom pas thugs nyams su myong ba'i sgo nas stsol ba kho na dang / 'chad tshul yang / blo chen rnams la zab rgya che/ /blo chung bzung bde go sla ba/ /de las ldog na mkhas rmongs kyi/ /slob ma dga' ba skyed mi nus/ /zhes gsungs pa ltar/ mdo sngags gang 'chad kyang gdul bya rang rang gi khams dang / bsam pa dang / bag la nyal gyi rim pa dang mthun par ston par mdzad cing / khyad par gsang sngags zab mo'i chos tshul rnams ni/ nyams su blang ba'i mtha'/ nyams su myong ba'i mtha'/ byin gyis brlab pa'i mtha'/ grub pa'i mtha' ste/ mtha' bzhi'i bdag nyid can dang / dbang gi chu bo ma nub pa/ byin rlabs kyi brgyud pa ma nyams pa/ gdams