[A:32]song ba na/ shar phyogs bhangga la'i pho brang gser gyi rgyal mtshan du rgyal po dge ba dpal dang / btsun mo 'od zer can gnyis la sras gsum 'khrungs pa'i/ bar pa zla ba'i snying po 'di nyid chu rta lor 'khrungs pa'i tshe pho brang gi thog mtshams la utpal sngon po skyes pa kun gyis mthong zhing / rgyal bu la sgrol mas zhal gzigs te rjes su bzung bar mkhyen/ dgung lo bcu'i bar du yi ge /bzo/ gso dpyad dang / lugs kyi bstan bcos sbyangs/ nyer gcig pa la sgra tshad/ sgyu rtsal drug cu rtsa bzhi/ zlos gar/ snyan ngag /rtsis rnams mkhyen/ dzai tA ri sogs bla ma lnga las theg chen gyi chos gsan nas/ rgyud man ngag rdzogs par mkhyen te lo drug tu brtul zhugs kyi spyod pa mdzad pas yi dam lha'i zhal gzigs/ ting 'dzin dang mngon shes lnga thob/ rdo rje rnal 'byor mas dngos su dbang bskur/ gsang sngags kyi rgyud sde mang du mkhyen pa'i nga rgyal yod pa na mkha' 'gro ma rnams kyis rgyud kyi glegs bam du ma bstan nas thugs rgyal bcag /rtsod pa'i sgo nas mu stegs tshar bcad/ mnal lam du thub pa'i dbang pos bskul te dgung lo nyer dgu la rab tu byung ba'i mtshan dI paM kA' ra shrI dznyA nar gsol nas/ zab mo lta brgyud/ rgya chen spyod brgyud/ nyams len byin rlabs kyi brgyud pa las 'ongs pa'i sde snod mtha' dag gsan cing thugs su chud pas mkhas pa'i grags pas khyab cing / btsun pa'i yon tan so thar dang 'gal ba'i nyes pa 'ong ma myangs/ byang sems dang sngags sdom la cung zad byung srid kyang de ma thag bshags te zhag tu 'grogs ma myangs gsungs