[A:42]gdul zhing mi mjed 'jig rten gyi khams 'di la ri rab/ gling bzhi/ gling phran/ lcags ri dang bcas pa yod pa'i gling bzhi gling phran gzhan las khyad par du 'phags pa 'dzam gling las kyi sa pa 'di la/ ri'i rgyal po gangs can/ brag gser gyi bya skyibs can/ mtsho chen po ma dros pa rdzing bu dal gyis 'bas pa/ shing sA la'i rgyal po la sogs pa yul gyi bkod pa ngo mtshar can du mas mdzes shing / ma dros pa'i 'gram du shing gi rgyal po 'dzam bu tri sha zhes bya ba la/ 'bras bu ro mchog brgya dang ldan pa rnams shin tu smin par gyur pas/ chu nang du lhung ba na/ dzam zhes bya ba'i sgra byung ba las mtshon te/ 'dzam bu'i gling du btags pa 'di la grong khyer chen po lnga brgya/ ljongs chen po bcu drug /yul phran stong / yul chen so gnyis/ gnas nyer bzhi/ dur khrod chen po brgyad/ mi rigs sum brgya drug cu/ skad rigs bdun brgya nyi shu sogs bsam gyis mi khyab pa yod pa'i/ shar phyogs na rgya nag dang khri brtan/ rgya nag tu mkhyen rab kyi bdag po 'phags pa 'jam dpal gyi pho brang ri bo rtse lnga/ lhor rgya gar dang kha che/ rgya mtsho'i 'gram na 'phags mchog phyag na padma'i pho brang ri bo gru 'dzin/ nub tu stag sde dang gzig yan/ rig 'dzin grub pa'i dbang po rnams dgyes rgur spyod pa'i gnas mchog au Di ya na/ byang du khram dang ge sar/ chos rgyal rigs ldan rim par byon pa'i gnas shambha lar cha bsags kyi pho brang grong khyer bye ba dgu bcu dang bcas pa yod pa'i yul gyi bye brag spur rgyal bod du grags pa gangs ri dpal dang ldan pas bskor ba'i ljongs/ 'phags