[A:51]bla na med pas gzengs bstod de slob bshad bstan pa'i srog gzung bar dgongs kyang / dus kyi skal bas mi ring bar nyang stod gnas gsar rgyal khang bla brang du ngo mtshar ba'i ltas dang bcas te dgyes mdzad rdo rje'i thugs kar thim/ gcung kun dga' bstan pa'i rgyal mtshan ni thams cad mkhyen pa mkhyen brtse'i dbang phyug gi rnam 'phrul du grags/ thugs mkhyen rab phul du phyin pas shes bya kun la mkhas shing / thugs rgyud zhi zhing dul/ rig 'dzin chen po padma phrin las dang / mkhyen rab byams pa ngag dbang lhun grub/ rmor chen rdo rje 'chang chen po sogs mkhas grub dam pa mang du bsten nas gsung ngag slob bshad/ mkha' spyod skor gsum/ dus kyi 'khor lo/ chos srung skor sogs chos bka' bsam gyis mi khyab pa gsan cing / thugs nyams su bzhes pas nyams rtogs tshad med par 'khrungs/ rig 'dzin chen po padma phrin las kyi drung du bsnyen par rdzogs pa'i sdom pa bzhes/ gsang chen bstan pa'i 'byung gnas bkra shis chos kyi sde chen po'i mkhan por mnga' gsol/ bla ma lha khang gi shing rtsi dang / ldebs ris su lam 'bras dang / mgon po gnyis kyi bla brgyud/ chog mang sgrub mchod kyi dkyil 'khor gyi gtso bo rnams dang / gzhan yang 'dod lha mang ba bcas bzhengs par mdzad cing / gcen ngag dbang blo gsal mchog ldan gyi gdung rten gser sbyangs kyi pa tra 'od kor sogs kyis mdzes shing / dngul las grub pa'i rin po che du ma'i rgyan gyis phyug pa/ byang chub chen po'i mchod rten bzo bkod phun sum tshogs pa/ 'dra sku rin po che dang bcas pa sgrub par mdzad