[A:༥༠༡]བ་ལགས་སོ། །དེ་དག་གི་དོན་བསྡུ་ན། གནམ་ལོ་སྒྲ་གཅན་འབར་བའི་གླང་དར་གྱིས། །ཁ་བ་རི་པའི་ལེགས་བྱས་གསོག་པའི་རྟེན། །ཕྱག་ན་པདྨ་འཇམ་དབྱངས་ཉི་ཟླ་ཟུང༌། །ཁོ་བོའི་སྣང་བ་འཕྲོགས་སོ་ཀྱེ་མ་ཧུད། །འོན་ཀྱང་དྲང་སྲོང་ཆེན་པོའི་བཀའ་ལུང་གིས། །བདེ་གཤེགས་བསྟན་པ་བྱང་ཕྱོགས་འཕེལ་བ་དང༌། འགྲིབ་པའི་ཚུལ་གསུངས་རྫུན་བྲལ་ཐ་ཚིག་ལ། །ཀུན་ཀྱང་རེ་ཞིག་ངལ་བསོ་བསྟེན་པའི་གྲོགས། །ངན་དེའི་གཉེན་པོར་དམ་བཅས་བྱང་ཆུབ་སེམས། །དཔལ་གྱི་རྡོ་རྗེ་སླར་བྱོན་ཚར་བཅད་དང༌། །མཉམ་དུ་བསྟན་པའི་མེ་རོ་ཉེར་གསོས་ཏེ། །དགོངས་དབྱིངས་རྫོགས་པའི་སྣང་བའི་ཟེར་ཕྲེང་སྦྱིན། །གསུང་ངག་ལེགས་བཤད་འདབ་མ་གྲོལ་བ་དང༌། །སྔགས་འཆང་ཨུཏྤལ་དཀར་པོའི་གོས་བཟང་ཅན། །སྔོན་མེད་གསར་དུ་བཞད་པའི་དགེ་མཚན་ནི། །སྲིད་གསུམ་ཆེ་དགུའི་གཏམ་གྱིས་བསུས་པར་ངེས། །ཞེས་ཀྱང་སྨྲས་སོ།། །། ༈ དགུང་གྲངས་སུམ་ཅུར་ཕེབས་པས་སྟག་དཔྱིད་འགོ་མར་གོང་བཞིན་གྱིས་བླ་མ་ཡི་དམ་སོགས་ཀྱི་སྐུ་པར་རྣམས་དང༌། རྗེ་རྡོ་རྗེ་འཆང་ཉིད་ནས་སྐུ་པར་སྟོང་དུ་ཉེ་བ། མཆོད་པ་རྒྱ་མཆོད་དགུ་བསྡོམས་ཉིས་བརྒྱ་སྐོར་འདེབས་པར་མཛད། རྟ་ཟླ་ནས་མཆོད་སྡོང་གི་ཟངས་དངུལ། གསེར། ཕྲ་རྒྱན་སོགས་བཟོ་གྲའི་བཀའ་འདོམས་མཛད་པའི་ཟངས་དངུལ་གསེར་ཕྲ་རྒྱན་སྐོར་རྗེ་ཉིད་ཀྱི་ཞལ་སྒོ་ལས་བྱོན་པའི་གདུང་རབས་ཞལ་སྐོང་བཞིན་དང༌། དེའི་ཚེ་གཞུང་ཞབས་རིན་པོ་ཆེ། སྡེ་དགེ་ས་སྐྱོང་སོགས་དྲག་ཞན་དུ་མ། ཞལ་ངོ་སོ་སོ། ཆོས་སྡེ་ཉི་ཟླ་ཟུང་སོགས་དགོན་སྡེ་མང་པོ་ཕྱག་གཉེར་དྲུང་གྲས། བླ་གཉེར་ཚང་གཞིས་མི་སེར་སྐྱ་སོགས་ཀྱིས་ཕྲ་རྒྱན་གསེར་དངུལ་ཟངས་སོགས་མང་པོའི་ཞབས་འདེབས་ཕུལ། ནག་ཟླ་ནས་བཟུང་རྗེ་རྡོ་རྗེ་འཛིན་ཉིད་ཀྱིས་རྣམ་རྒྱལ་སྟོང་མཆོད་ཇི་སོང་བར་གསོག་གནང་སྐབས། གཏེར་སྟོན་རིག་འཛིན་ཚེ་དབང་བཀྲ་ཤིས་ཀྱིས། དེའི་གཏེར་ཆོས་ཞིག་གི་ལུང་བསྟན་ལས། ས་སྐྱ་བོའི་ནང་གི་ཀུན་དགའི་མིང་༔ རྐྱེན་བར་ཆད་དམ་