[A:310]smad tshong mar snang nas kyang sems can gyi don mdzad do/ /zhes dang / 'jam mgon bla ma sa skya paNDi tas/ khyod ni rgyal dang rgyal ba'i sras/ /rab byung dge bsnyen khyim pa sogs/ /'gro ba kun gyi gzugs mdzad nas/ /gdul bya thams cad smin par mdzad/ /nyi ma'i 'od zer rab tsha yang / /me shel med par me mi 'byung / /de bzhin sangs rgyas byin rlabs kyang / /bla ma med par 'byung mi nus/ /zhes sogs mdo rgyud dgongs 'grel dang bcas pa nas rgya cher gsungs shing / mdor na snod bcud kyi rnam pa ci dang cir snang ba'i rnam rol du mas sems can gyi don mtha' yas pa zhig mdzad pa ni/ 'jig rten na blo ldan gzur gnas rnams kyi dgongs pa'i bang mdzod du bzhugs pa de ltar lags pas/ nges pa'i don du khyab bdag sku bzhi ye shes lnga ldan de nyid kyi ngo mtshar mdzad pa'i phung po yongs su rdzogs pa ni sras bcas rgyal ba kun gyis spyod yul du gyur pa'ang ma yin na/ rmongs brtul bdag lta bu skyes sbyangs kyi yon tan khab kyi mig bu bas kyang ches phra ba zhig gis spyad byar lta ga la zhig ste/ cha shas tsam zhig prastA ra'i lam du 'grims 'dod 'di nyid kyang mkhas pa rnams kyis gzha'i gnas su gdon mi za yang / ji srid byang chub snying po ma thob bar gyi skyabs gcig rdo rje 'chang chen po de nyid kyi dgongs pa zab mo chos kyi dbyings de bzhin nyid du rdzogs pa'i ched dang / rang nyid kyang mkhas pa'i bya bar bag chags bzang po 'jog pa'i phyir/ 'di lta bu'ang nges par rigs pa zhig las mi rigs pa'i klan ka 'jug pa ni nam yang ma mchis pa/ gang gi rgyu mtshan de rnams kyis gsal bas na/ snyan tshig dang sdeb sbyor sogs go dka' ba cher spangs te/ lhag bsam g.yas 'khyil bkra shis kyi dung gi rjes su zhugs nas/ kun dang thung mong du go bde'i ngag gis 'chad par spro ba lags so// // ! gnyis