[A:442]'jam pa'i rdo rje rdo ring bar/ /snying nas gsol ba 'debs so byin gyis rlobs/ /zhes gsungs pa 'di 'dra'i rigs gzhan yang rje nyid la mang du 'khrungs kyang gsang 'os 'ga' zhig ni 'od gsal de las bzhengs nas thugs dran cher mi gsal ba'i tshul mdzad lags/ rta zla'i nang sa ngor bstan pa'i sbyin bdag chen po mdo smad sa yi thig le sde bzhi dge bcu'i dpal mngon par 'bar ba'i rgyal khab nas/ sa skyong blo gros rgyal mtshan sku 'khor rnams gdan sa chen por chibs bskyod mdzad thog rje rdo rje 'chang chen po'i dpal gyi mgur nas zab rgyas chos kyi bdud rtsi grol bar mdzad pa ni 'di ltar mthong ste/ thog mar sku tshe mi 'gyur rdo rje'i rang bzhin du bya ba'i phyir rje btsun sa skya pa'i yab chos dze tA ri'i lugs kyi 'chi med dbang po'i dkyil 'khor du dbang bskur ba/ ye shes kyi mkha' 'gro ma'i zhal bcud dpal ldan birWa pa'i zhabs kyis legs par bkral ba kye rdo rje man ngag lugs kyi rgyu dbang dang lam dbang / grub pa'i slob dpon chen po nag po pa'i lugs kyi rnal 'byor gsang mtha'i smin byed zab mo'i dbang / pha bla na med pa'i dkyil 'khor gyi gtso bo dpal gsang ba 'dus pa 'phags lugs su grags pa mi bskyod rdo rje'i dbang / rje btsun sa skya pa'i yab chos rnying ma 'khon rog shes rab tshul khrims kyis rkyen 'ga' zhig la brten rnying ma'i chos skor rnams g.ya' lung 'jags gshongs kyi sa'i char gter du sba bar mdzad dus yang phur gnyis chos skyong bka' gnyan pa'i stabs sba bar mdzad ma thub pa nas bzung / bsnyen cing sgrub par mdzad pa'i dpal chen yang dag zla gam dgu pa dang / phrin las lhun grub sa phur lha lnga bcu rtsa gcig gi dkyil 'khor du dbang bskur ba dang / gzhan yang rdo rje