[A:317]gzigs pas/ mo dbul mo bya rdzi ma mi gcig gi bya 'tshos pa'i gla sogs gong gi rgyu mtshan la brtags pas/ ngo mtshar te/ de ltar bya ru rung zhes bka' stsal gnang bas/ bya rdzi ma dga' mgu yi rangs te/ slar yang rgyal po la bskor ba mang du byas nas rang gi khyim du log ste rim pas/ mo rang ma bu lnga dang / bran gcig rnams kyis/ glang po che gcig dang bong bu gcig yod pa las bkal zhing bskyas te/ mchod rten chen po khri 'phangs gsum du brtsigs tshar ba'i tshe/ bal yul gyi mi thams cad kha 'chams te/ mo dbul mo bya rdzi ma mi gcig gis 'di tsam gyi mchod rten bzhengs na/ rgyal blon phyug po sogs mi drag pa kun gyis ji lta bu'i mchod rten bzhengs/ 'di kun la brnyas shing gnod par 'gyur pas rgyal por zhus te/ rtsig tu ma bcug pa 'thad zer nas rgyal por zhus pas bka' stsal pa khyed rnams thams cad legs par nyon cig /mo dbul mo bya rdzi mas 'di lta bus mchod rten bzhengs pa ngo mtshar re che bsams nas ngas ni bya ru rung zer ba kha nas shor ro/ /nga rgyal po smra ba lan cig yin no gsungs/ gzhan mi rnams kyis bkag kyang mi khegs par brtsigs pas lo bzhi la bum pa man brtsigs zin pas/ de'i dus su bya rdzi ma de nyid tshe'i dus byed par shes te/ bu bzhi g.yog dang lngar smras pa/ khyed rnams kyis nga'i yi dam/ 'gro ba dpag tu med pas bsod nams gsog pa'i zhing 'di nyid zhabs su chug la/ 'di'i nang du de bzhin gshegs pa'i ring bsrel bzhugs su gsol te/ rab tu gnas pa rgya chen po gyis shig /des ni nga'i bsam pa dang / dus gsum gyi sangs rgyas thams cad kyi dgongs pa rdzogs shing / /khyed rnams kyis kyang 'di phyi'i don 'grub par 'gyur ro/ /zhes smras te tshe'i dus byas so/