[A:318] de nas bu rnams gros byas te glang po dang bong bur sa bkal/ g.yog la grogs bcol nas kun dril lo bdun la zhabs su chug ste/ de bzhin gshegs pa 'od srung kyi ring bsrel ma ga dha'i bre gang srog shing gi nang du bzhugs su gsol nas/ mchod tshogs dpag tu med pa dang bcas te rab tu gnas pa'i me tog 'thor ba'i tshe/ mdun gyi nam mkhar de bzhin gshegs pa 'od srungs 'khor dang bcas pa thams cad dang / phyogs bcu'i sangs rgyas byang sems dgra bcom pa'i 'khor tshogs dang bcas pa rnams kyis mgrin gcig tu/ khyed rnams kyi lhag pa'i bsams pa rnam par dag pas mchod rten chen po 'di bzhengs pa'i phan yon gyis rang rang gis smon lam ci btab pa thams cad 'grub par 'gyur bas thob cig bka' stsal bas/ che ba rta rdzis/ bdag gi lhag bsam rnam par dag pas ma'i mchod rten la bum pa btags pa'i phan yon gyis/ bdag ma 'ongs snyigs ma lnga bdo'i dus su de bzhin gshegs pa shAkya thub pa'i bstan pa la/ 'khyags pa 'khyags yul gyi mtha' 'khob tu chos skyong ba'i rgyal po chen po zhig tu skyes nas/ sangs rgyas kyi bstan pa rin po che 'dzug par shog cig /ces brjod/ de 'og phag rdzis/ ma'i mchod rten la bum pa btags pa'i phan yon gyis phu bo chos rgyal du skyes nas sangs rgyas kyi bstan pa rin po che 'dzugs pa'i dus su/ 'khyags pa 'khyags yul gyi mtha' 'khob der/ bstan pa'i gzhi ma dge 'dun gyi sde 'dzug dgos pas/ bdag ni dge slong rnam par dag pa zhig tu skyes nas/ dge 'dun thams cad rab tu byung bar byed pa'i mkhan po chen po zhig tu skye bar shog /ces brjod/ de 'og khyi rdzis/ ma'i mchod rten la bum ba btags pa'i phan yon gyis/ phu bo khyed gnyis 'khyags pa 'khyags yul gyi mtha' 'khob tu/ gcig gis sangs rgyas kyi bstan pa 'dzugs/ /gcig gis bstan pa 'dzin pa'i dus