[A:333]zhus pas/ ma 'ongs pa'i dus su ma hA kA la gnyis der phrin las mdzad pa'i ltas su 'dug gsungs te/ deng sang dpal sa skya pa'i chos skyong gur zhal gnyis la mdzad pa 'di lung bstan/ de nas phyag 'tshal sgang du phebs pa dang / chibs bshol nas mchod pa shoms gsungs te sa dkar logs la phyag mchod rgyas par mdzad/ de ltar mdzad pa ci lags zhus par/ khyed kyis ma mthong ngam/ sa dkar po pha gi'i logs la dhIHyig bdun dang hUM yig gcig rnams 'dug pa la phyag mchod byas pa yin gsungs/ de ci'i ltas lags zhus pas/ ma 'ongs pa'i dus su/ 'jam dbyangs kyi sprul pa bdun dang / phyag na rdo rje'i sprul pa gcig ste brgyad rnams gnas pha gir byon nas 'gro ba'i don mdzad pa'i rtags su 'dug /ces gsungs te lkog gyur rjen par gsal ba'i lung gis bsngags par mdzad pa dang / gzhan yang ye shes kyi mkha' 'gro ma rdo rje bdag med mas dngos su rjes su bzung bas sa drug gi rtogs pa brnyes pa/ 'jigs bral stobs kyi mgon po bi rU pa nyid kyis/ mon grog nas 'bal grog gi bar skyil krung gcig gis khyab par mdzad nas/ gnas 'di nga dbang zhes 'phags mchog phyag na padma brtse chen kun dga' snying po nyid la zhal mngon sum du bstan nas lcags ri mi 'da' ba'i gser chos bzhis mtshon/ rgyud sde bdun cu rtsa gnyis kyi gdams pa rnams stsol ba dang chabs gcig byin rlabs kyi ngo mtshar bkod pas khyab par mdzad pa dang / gzhan yang ma gcig lab kyi sgron mas/ sa dkar logs kyi nel thang skya mo der/ /tshangs pa'i rigs can lha yi sras kyis bzung / /zhang zhung yul rnams lha sder btsud pa yong / /rten gsum pho brang bstan srung der gnas te/ /'jam dpal rnam sprul gzugs bzhis 'gro ba 'dren/ /khyad par lhag par mi g.yo'i sprul pa ni/ /dpal gyi mtshan