[A:334]can mtshan ldan skyes bu 'byung / /mu stegs btul nas shAkya'i bstan pa rgyal ba ste/ /bstan bcos nyams pa gso dang bstan pa'i ba dan nam mkhar 'phyar/ /bstan pa mi nub bstan pa'i rgyal mtshan 'dzin/ /bstan pa'i rgyal mtshan dam pa de 'dra 'byung / /zhes gnas dang gang zag shin tu gsal bar bstan pa dang / der yang ma zad rgyal dbang padma ka ras/ klong gsal mkha' 'gro snyan brgyud kyi lung bstan las/ kun dga' snying po sa skya lotstsha dang / /bsod nams rtse mo grags pa rgyal mtshan zhes/ /rigs gsum mgon po'i sprul pa gtsang du 'byung / /zhes dang / sa skya lotstsha kun dga'i ming / /'phags pa'i ming can gnyis byung nas/ bod khams sems can bde la phan/ /sangs rgyas bstan pa lnga bcu 'dzin/ /'jam pa'i dbyangs kyi sprul pa yin/ /zhes sogs mang du gsungs kyang spros pa cher spangs te/ gnad thog tu dril nas 'dir cung zad smos pa'ang dgos pa bla na med pa dang ldan pa'o/ /smras pa/ rtsod bral lung gi pho nya'i bden pa'i gtam/ /yon tan mngon par gsal ba'i tha tshig ni/ /rdzogs par chud pa'i rab dkar nor 'dzin ma/ /grom stod gnyis 'thung sa 'dzin lto bar bstan/ /sgrib bral mngon shes spyan lnga'i lam po cher/ /'byung 'gyur rten 'brel dge ba'i mtshan ma'i gzugs/ /byed pos ngal bas lhur blangs bgyis min par/ /grub 'di gzur gnas blo mtshor ngo mtshar gyi/ /snang ba 'bar bar 'dzin na rten brten pa/ /ya mtshan phyur por lud pa'i khong seng la/ /che dgu'i thor tshugs dbang med 'dud pa'i zhing / /stug po bkod pa'i do zlar 'di na mtho/ /zhes kyang smras so// // ! gnyis pa bod kyi rdo rje gdan dpal ldan sa skya 'di nyid bstan rtsis dang sbyar te btab tshul ni/ spyir bstan rtsis la mdo rgyud nas gsungs tshul tha dad pa'i dbang gis/ mkhas pa rnams bzhed srol mi mthun