[A:337]dge mtshan thams cad dang ldan pa'i gnas so/ /de dag gi don bsdu na/ dbang phyogs sa 'dzin lag ldan myos bum rtser/ /'gro 'dren dpa' bo mi bskyod rdo rje'i zhabs/ /lho phyogs bzang po'i rta mchog kha 'bab rgyun/ /rin chen 'byung ldan phrin las dpal du che/ /yid 'phrog chu lha'i phang par 'jug sgra can/ /ne'u gseng g.yu ngogs bkra shis ke sgras 'phyo/ /'od mtshan 'gro ba dpag med 'dren pa'i mgon/ /ma chags padmar ngal 'tsho gnod sbyin phyogs/ /mkha' 'gro'i dbang phyug lus skyes rdzogs pa'i khrod/ /sa skyob spo la don yod grub pa'i sku/ /'jigs med ri dwags dbang po 'gying ba'i sa/ /dpal ldan rdo rje 'chang gi bsti gnas lags/ /zhes kyang smras so// // ! gnyis pa rigs rus cho 'brang phun sum tshogs pa dang ldan pa'i gdung rabs byon tshul bshad pa ni/ khri brgyad stong pa las/ de la byang chub sems dpa' sems dpa' chen po'i rigs phun sum tshogs pa gang zhe na/ byang chub sems dpa' sems dpa' chen po'i rigs chen po dag tu skye ba ste/ de ni byang chub sems dpa' sems dpa' chen po'i rigs phun sum tshogs pa yin no/ /de la byang chub sems dpa' sems dpa' chen po'i cho rigs phun sum tshogs pa gang zhe na/ byang chub sems dpa' sems dpa' chen po rgyal rigs shing sA la chen po dag dang / bram ze'i rigs shing sA la chen po dag tu skye ba ste/ de ni byang chub sems dpa' sems dpa' chen po'i cho rigs phun sum tshogs pa yin no/ /de la byang chub sems dpa' sems dpa' chen po'i rus phun sum tshogs pa gang zhe na/ rigs gang las sngon gyi byang chub sems dpa' sems dpa' chen po dag byung bar gyur pa ste/ de ni byang chub sems dpa' sems dpa' chen po'i rus phun sum tshogs pa yin no/