[A:699]par mdzad de gzhi thog pho brang du phyags legs par phebs nas/ sku ngo tshang ma zhal rgyas thog gang ci'i phyi nang gsang ba dus gsum gyi gnas tshul dang bcas ji bzhin gsung ba dang / phyag gnyer gsol gzim mchod sogs gzhan ma rnams la'ang gnang cha gya nom pa dang bcas so sor snga phyi bar gyi gsung gleng ji bzhin mdzad de/ dus gtor sogs la thugs gzhol ba'i skabs so/ /smras pa/ skyabs kun 'dus pa'i nor bu'i za ma tog /phyi rol 'dod 'jo'i dpal du shor dogs kyang / /mi dman bsod nams ldan pa'i ded dpon gyi/ /lag tu son pas cung zad yid dbang bde/ /'on kyang snyigs dus sems can dbul po'i lag /ji ltar brkyangs kyang bsam 'phel mi 'byung dang / /byung yang yun du mi gnas gna' bo'i gtam/ /bden par nye ba'i dus shig shar min nam/ /ji bzhin dpyad tshe snang tshul thams cad kyang / /gzhan don nye ba'i gong ma'i rnam thar dang / /mthun pas thabs brgya'i 'phrul la kun gus kyang / /ngan spyod khrel bas dgongs pa mngon du phyogs/ /zhes kyang smras so// // ! rtsa ba'i sa bcad lnga pa zhing 'di'i gdul bya re zhig rdzogs nas mthar sku zhi ba mchog gi dbyings su thim ste dgongs pa zab mo rdzogs thabs rnams mdzad tshul ni/ de nas snron zla phyi ma'i tshes gcig gi bar du thugs dam nyams bzhes rnams chag med dang spyi sgos nas zhabs pad yun brtan gyi gsol 'debs/ gsung bris/ zhal bkod sogs kyi skabs su'ang gdul bya'i blo sna 'khrid pa'i phyir du rje rdo rje 'chang chen po nyid kyi sku la skyon mi yong ba'i gsung 'ba' zhig snga phyi kun tu byon pa dang / khyad par gzim chung skor gyi rten rnams sku mdun du spyan drangs/ re re nas phyag bzhes kyi sngon byon dang rje nyid kyi phyag babs rnams so sor ngo sbrod dang / bla ma gong ma'i rten sgam rnams kyang zhal phye nas so sor 'di dang 'di zhes bya ba'i ngo sprod sogs mdzad mu'i srod tho rengs kyi cha 'ga'