[A:305]mdzod sgo yangs pa'i gzhi yang 'di phye yis/ /bstan 'gro'i gsos su byos shig bka' bzhin byed po nga'o sgrogs byed nor gyi lha rnams dga' ba'i gar gyis brel/ /grangs med chos phung rgya mtsho mkhyen rab kyi/ /lto ba dag pa'i dbyings su hub gcig gis/ /'dren la gcig tu ma gyur a gastya/ /paN grub lotstsha 'phur byed tshogs bzhin gsal/ /bsil ldan ra ba dkar po'i 'dun khang na/ /gtum spyod ngan pa'i zlos gar bsgyur ba'i dus/ /dge bcu'i khrims kyi lam du bsrang mkhas pa'i/ /mkhan slob chos gsum rnam thar bsam gyin dad/ /khyad par phyi dar bstan pa'i nyi ma mchog /'gro ba'i mgon po dpal ldan a ti shas/ /dag snang rab 'byams klong du lung bstan bzhin/ /rigs gsum 'byon gnas rdo rje'i gdan sa che/ /'jigs bral stobs kyi mgon pos nga dbang zhes/ /skyil krung gcig gis mon bal grog gi bar/ /byin brlabs gnas 'dir sngon du'ang za hor gyi/ mahA gu ru'i mi 'jigs gzer btsas bsrungs/ /yul gyi khyad par dge bcu brdal ba'i dbus/ /lto 'gro'i dbang po rtse dga'i do ra che/ /sa la sgo rum nyid du mnga' gsol te/ /'khon ston ratna rA dza'i dpal gyis bskrun/ /de lta'i ngo mtshar zhing gi gandho lar/ /tshad ldan lung rigs dpyad gsum pho nya yis/ /bskul ba'i rigs gsum sprul pa'i zlos gar ni/ /dag byed gnyer ma'i ngang tshul bzhin du gsal/ /brgyad khri bzhi stong chos phung kun dga'i mtsho/ /bsrubs skyes bdun cu rtsa gnyis snying po'i nor/ /ris med bsod nams rgyal mtshan rtse mo ru/ /snyan grags khyab pa rgyal ba'i mtshan mchog gsum/ /'jig rten kun tu dga' ba rgyal ba'i bstan/ /mtshan mchog gsum ldan blo gros rigs kyi dpyid/ /dog pa chad med srid zhi'i rgyal khab tu/ /mtshan bzang 'dzin rgyun dus gsum tshogs rnams bsngags/ /