[A:306]de las skye 'gro'i legs byas me long du/ /phan bde'i snang brnyan mchog tu shar ba'i mgron/ /bdud rtsi'i zas can dang bcas 'jig rten gyi/ /bslu med skyabs su che khyod slar yang bsngags/ /gang gis mdzad phrin sngo bsangs sgeg mo'i lus/ /rdzogs par gzigs la sras bcas rgyal ba yang / /ngal ba nyid na byis blo zhing rdul gyi/ /rjes su bsnyegs kyang e raNDa yi 'bras/ /'on kyang lhag bsam dad pa'i shing rta yis/ /jeng drangs ngo mtshar mdzad pa'i bcu gnyis bdag /yid kyi mkha' la mngon par gsal ba'i phyir/ /ci shes tshad ma'i lam nas 'dren par spro/ /sbyangs stobs yon tan phra mo'i byis pa'i blo/ /mtha' bral mdzad par 'jug 'di spyi brtol che/ /'on tang gzu lums rdzun bral bden gtam 'di/ /'jam mgon 'khon ston bka' yis gnang ba'ang stsal/ /gang 'di rdo rje 'dzin mchog dgyes rdzas te/ /kun slong dri nga can gyi snying 'bigs mtshon/ /'brel med bab col bral ba'i legs bshad de/ /mthu ldan ma hA kA las bdag pa'i nor/ /yon tan 'khyog por bskul ba'i gnam ru'i rgyud/ /sgro btags tshig gi nyag phran brten bcas nas/ /dregs pa'i skad gsang mthon por 'byin pa dang / /rnam kun mtshungs pa'i go skabs 'di na dben/ /rtogs brjod ngo mtshar 'phrul gyi sa gzhi la/ /dge legs sa bon dar ba'i rol rtsed kyis/ /sde bzhi'i 'bras bzang phang phung 'byung ba'i gnas/ /dad ldan skye dgu'i gsos su 'di na bstar/ /zhes mchod par brjod cing / /bshad par dam bca' bas sdun bsus nas/ 'dir gleng bar bya ba ni/ 'jig rten na ma lus shing lus pa med pa'i 'gro ba skabs gsum na gnas pa dang bcas pa'i ma 'dris pa'i mdza' bshes chen po/ rab 'byams mu mtha' klas pa'i stobs bcu mnga' ba yod do cog gi 'gag med