[A:307]yan lag drug cu'i nA da'i gsang ba bdag gir bzhes pa'i brtan pa'i 'khor lo/ /rgyu med 'gro la rjes su chags pa de dag gi brtse chen ye shes kyi rang bzhin phung po'i gzugs su chas pa'i 'phags mchog phyag na padmo/ sgrib gnyis bag chags dang bcas pa'i smag rum stug po pha mthar 'joms shing mthu stobs kyi drag rtsal rgod pa'i gsang ba'i bdag po nyid du'ang grub pa/ ris su ma phyed pa'i zab pa dang rgya che ba'i lugs srol bsam gyis mi khyab pas thugs kyi bum bzang gtams pas dgos 'dod ma lus pa'i gter gyi rin chen 'byung ldan/ de la brten nas rgyal ba nyi ma'i gnyen gyi lung rtogs bstan pa rin po che la dpyad gsum rnam par dag pa'i sgo nas 'chad rtsod rtsom gsum gyis byi dor mkhan po/ bye brag rje btsun brtse chen snying po'i snyan brgyud gdams pa'i tsha zer gyis skal ldan gdul bya'i blo gros kyi pad tshal 'byed la gzhan dring mi 'jog pa/ bgrang ba las 'das pa'i skye 'gro'i legs byas kyi pho nyas drangs pa'i bla na med pa'i mchod sdong chen por lhun gyis grub pa/ chos kyi rje/ chos kyi rgyal po/ chos kyi dbang phyug /chos dam pa'i 'byor pa thams cad kyis phun sum tshogs shing / 'khor ba dang mya ngan las 'das pa'i dpal dam par son pa/ nges pa'i don du khyab gdal mi 'gyur dri ma gnyis bral dbyer med nam mkha' lta bu chos nyid de bzhin nyid kyi sku'i ngang las g.yo ba med bzhin du/ gdul bya rnams kyi khams dang / bsam pa dang / bag la nyal dang rjes su mthun pa'i sgo nas gzugs sku rnam pa gnyis kyi rol rtsed gang 'dul sprul pa'i zlos gar gyis dus 'dir/ rdo rje slob dpon mchog gi skur bstan nas/ sems can 'khor du ma 'dus pa rnams bsdus/ bsdus pa rnams smin/ smin pa rnams grol/ grol ba rnams mthar phyin pa'i lam la bkri