[A:308]bar mdzad pa po/ dpal sa skya pa chen po sngags 'chang bla ma thams cad mkhyen pa ngag dbang kun dga' blo gros sangs rgyas bstan pa'i rgyal mtshan dpal bzang po/ zhes pa'i mtshan snyan su zhig gi dad pa'i yid mtshor shar ba tsam gyis byin rlabs kyi chu bya dbang med du 'khor nus na/ sku che ba'i yon tan rnams kyi 'jing nas mu to ba bdag gi blo gros kyis ji nus su gang zin len pa 'di nyid ni/ skal bzang gi dpal la lhag par longs spyod pa'i dga' spro phan tshun 'gran pa'i rnam 'gyur brgya phrag g.yo bzhin du 'chad par byed pa la/ rgyal sras shAnta de was/ sngon chad ma byung ba ni 'dir brjod min/ /sdeb sbyor mkhas pa'ang bdag la yod min te/ /de phyir gzhan don bsam pa'ang bdag la med/ /rang gi yid la bsgom phyir ngas 'di brtsams/ /dge bar goms phyir bdag gi dad pa'i shugs/ /'di dag gis kyang re zhig 'phel 'gyur la/ /bdag dang skal ba mnyam pa gzhan gyi kyang / /ci ste 'di dag mthong na don yod 'gyur/ /zhes gsungs pa ltar gyi rjes su zhugs nas 'chad pa skabs su bab pa yin la/ de la rdo rje slob dpon sogs dam pa rnams kyi yon tan la bsngags pa'i phan yon dang / phan yon can gyi rtogs pa brjod pa gnyis kyi sgo nas bsnyad par bya ba ste/ dang po ni mdo las/ 'di ltar 'jig rten na rigs thams cad kyi bla mar gyur pa shAkya rnams kyi skyes pa'i rabs bzung zhing kun chub par byas nas/ gzhan la yang rgya cher bsnyad na/ chos dang mthun pa'i bsod nams kyi phung po dpag tu med pa 'byung la/ yon tan bsam gyis mi khyab pa 'phel bar byed pa yin no/ /zhes dang / sangs rgyas dang byang chub sems dpa' ganggA'i rlung gi bye ma snyed la/ bskal pa ganggA'i rlung gi bye ma snyed du bsnyen bkur ba bas ni/ rdo rje slob dpon gyi ba spu'i bu ga gcig la til mar gyis byugs pa ches khyad par du 'phags so/ /