[A:༡༦]པས་འདུལ། ཁ་ཅིག་ནི་ཀླུས་འདུལ། ཁ་ཅིག་ནི་རྫུ་འཕྲུལ་ཆེན་པོས་འདུལ། ཁ་ཅིག་ནི་རྒྱལ་པོས་འདུལ། ཁ་ཅིག་ནི་ཏིང་ངེ་འཛིན་གྱིས་འདུལ། ཁ་ཅིག་ནི་ཆོས་ཉན་པས་འདུལ། ཁ་ཅིག་ནི་ཆོ་འཕྲུལ་གྱིས་འདུལ། ཁ་ཅིག་ནི་དེ་བཞིན་གཤེགས་པ་མྱ་ངན་ལས་འདའ་བས་འདུལ། ཁ་ཅིག་ནི་རིང་བསྲེལ་གྱིས་འདུལ་ཞེས་བྱ་བ་ལ་སོགས་པ་དང༌། ཡང་མདོ་དེ་ཉིད་ལས། ཀྱེ་རྒྱལ་བའི་སྲས་དག །དེ་བཞིན་གཤེགས་པ་སྡུག་བསྔལ་རྣམ་པ་སྣ་ཚོགས་ཀྱིས་བསྒྲིབས་པའི་སེམས་ཅན་རྣམས་དང༌། ཁམས་སྣ་ཚོགས་ཀྱིས་འདུལ་བའི་སེམས་ཅན་རྣམས་ཀྱི་སྤྱོད་པ་མཁྱེན་ནས་ཡོངས་སུ་མྱ་ངན་ལས་འདའ་བ་ཡང་སྟོན། སྐྱེ་བ་ཡང་སྟོན། འཁོར་ལོས་སྒྱུར་བའི་རྒྱལ་པོ་ཡང་སྟོན། རྩེ་བ་དང༌། དགའ་བ་དང༌། བུད་མེད་ཀྱི་བཞད་གད་དང༌། ཀུ་རེ་དང༌། དྲི་དང༌། ཕྲེང་བ་དང༌། དགའ་ཞིང་རྩེ་བ་ཡང་སྟོན། ཁྱིམ་ནས་འབྱུང་བ་དང༌། རབ་ཏུ་བྱུང་བ་དང༌། དཀའ་བ་སྤྱད་པ་རྣམས་ཀྱང་སྟོན། བདུད་བཏུལ་བ་དང༌། ཆོས་ཀྱི་འཁོར་ལོ་བསྐོར་བ་ནས། ཆོས་ཀྱི་སྤྲིན་ཆེན་པོའི་ཆར་ཕབ་པས་སེམས་ཅན་རྣམས་ཚིམ་པར་བྱེད་པའི་བར་དུ་ཡང་སྟོན་ཏེ། དེ་བཞིན་གཤེགས་པ་རྣམས་ཡོངས་སུ་མྱ་ངན་ལས་འདས་ཀྱང་སྦྱོར་བ་སྣ་ཚོགས་ཀྱིས་རིང་བསྲེལ་མཆོད་པ་དང༌། མཆོད་རྟེན་དང༌། གཙུག་ལག་ཁང་དང༌། སྐུ་གཟུགས་བྱེད་དུ་གཞུག་པ་དང༌། རབ་ཏུ་བྱུང་བའི་ཕྱིར་ཁྱིམ་ནས་བྱུང་བ་དང༌། དགེ་སློང་གི་དགེ་འདུན་རྣམས་མཆོད་པ་དང༌། དམ་པའི་ཆོས་འདྲི་བ་དང༌། བཀླག་པ་དང༌། ཁ་ཏོན་དུ་བྱ་བ་ལ་སྤྲོ་བ་སྐྱེད་པ་དག་གིས་ཀྱང་སེམས་ཅན་ཐམས་ཅད་ཐར་པར་མཛད། །ཅེས་སོགས་མང་དུ་གསུངས་ཤིང༌། ཆོས་ཡང་དག་པར་སྡུད་པའི་མདོ་ལས་ཀྱང༌། བྱང་ཆུབ་སེམས་དཔའ་རྣམས་ཀྱི་