[A:141]gnang / /gzhan don gshegs tshe 'ja' 'od me tog char/ /bar snang sprin rnams mchod sprin sna tshogs gzugs/ /dpa' bo mkha' 'gros dngos su bsus la 'dud/ /bdun phrag bar du 'od gsal ngang la bzhugs/ /sa dang lam gyi lhag ma kun bgrod nas/ /zung 'jug rdo rje 'chang sa mngon gyur pa'i/ /dus gsum sangs rgyas de la snying nas 'dud/ /rtsa brgyud bla ma rnams dang thugs rgyud gcig /grub stsol yi dam thams cad 'dus pa'i sku/ /rdo rje'i chos skyong nor lha'i mnga' bdag rje/ /rtsa gsum kun 'dus khyod la phyag 'tshal lo/ /zhes gsung par mdzad do/ /thugs dam la bzhugs pa'i skabs rnams su'ang / phan gling bla brang gi steng du 'ja' kha dog sna tshogs pas gur phub pa lta bur yod pa skye bo dad pa can kha cig gis mthong ba sogs ngo mtshar ba'i ltas mang du byung ngo / /de nas tshes nyer dgu'i nyin mi phyed pa'i dad pa brtan pos rgyud yongs su brlan pa'i sbyin bdag bu slob rnams la sku gdung rin po che mig gi bdud rtsir bstan pa dang gsol ba 'debs su bcug cing / de'i rjes su rgyud dang man ngag gi gzhung rnams las ji ltar 'byung ba bzhin 'jig rten kun gyi mchod sdong bla na med pa'i sku gdung rin po cher cho ga rnam par dag pa'i sgo nas bsgrubs pa'i bum chus yang dang yang du sku khrus legs par gsol zhing / tsandan dang / gur gum la sogs pa'i dri bzang dang / sman sna tshogs kyi lde gus yongs su byugs pa dang / ras ser pos legs par dkris shing / dbu rgyan dang / lha rdzas kyi na bza' mang pos mdzes par bklubs te/ gdung sgrom gyi khri'i steng du spyan drangs nas mchod pa'i bye brag bsam gyis mi khyab pa byang chub sems dpa' kun tu bzang po'i mchod sprin lta bu'i dbus su bzhugs su gsol lo/ /de'i tshe'ang nam mkha' thams cad 'ja' sprin gyis gang ba dang / phan