[A:142]gling bla brang gi steng du 'ja' zug pa dang / me tog gi dbyibs lta bu yod pa'i gangs zim bur babs pa sogs skye bo thams cad kyi mthun snang du grub pa dang / khyad par sku gdung gi dbu dang zhal ras ni sngar mu ltar la/ sku gzugs dngos byis pa lo bcu lon pa'i gzugs kyi tshad tsam las ma mchis pas gdan drang pa dang / sku khrus gsol ba'i tshe shin tu sla bar snang ngo zhes bdag gi bla ma'i zhal snga nas gsung ngo / /de nas gzim chung gi mdor mkhas dbang kun dga' don grub pa dang / gdong dgon bla ma bstan 'dzin phun tshogs bcas kyis gtso mdzad dge 'dun bcu phrag gcig gis dpal kye rdo rje'i ras bris kyi dkyil 'khor zhal phyes te sgrub cing mchod pa dang / logs shig tu dge 'dun nyi shu skor gyis bcom ldan 'das kun rig rnam par snang mdzad kyi dkyil 'khor bzhengs te sgrub cing mchod pa sogs mdzad pa dang / sde dge chos rgyal mchog nas kyang nyer spyod lnga re re nas stong phrag tu longs ba la sogs pa'i mchod pa shin tu rgya che ba dang / sku gdung rin po cher 'bul ba rin chen gnyis pa thur srang lnga bcu/ ljon 'dab 'khor drug sum brgya/ mar khal drug brgya la sogs pa shin tu zab cing dpangs mtho ba dang / gzhan yang bka'i mdun na 'don rnams kyis gtso mdzad pa'i chos rgyal chen po'i sku 'khor ba rnams dang / lhun grub steng gi bla ma dbu chos sogs kyis gtsos pa'i grwa rigs sbyin bdag thams cad nas kyang gdung mchod dang / gdung 'bul la sogs pa shin tu rgya che ba'i legs byas kyi zla 'od gzhon nus bsod nams kyi chu gter ci'ang rgyas par byas so/ /de nas hor zla gnyis pa'i tshes drug gi nyin klu ldings zhabs drung rin po che ngag dbang bstan pa'i rgyal mtshan gyis dbu mdzad pa'i dge slong bcu phrag gcig gis dpal kye rdo rje la brten pa'i dus tha ma'i cho ga'i sgo nas zhugs 'bul ba dang / grub