[A:17]'phrul pa chen po rnam pa bcur khong du chud par bya ste/ gang zhe na 'khor los sgyur bar 'phrul pa dang / brgya byin du 'phrul pa dang / tshangs par 'phrul pa dang / nyan thos su 'phrul pa dang / rang sangs rgyas su 'phrul pa dang / byang chub sems dpar 'phrul pa dang / sangs rgyas su 'phrul pa dang / sangs rgyas kyi zhing du 'phrul pa dang / byang chub kyi snying por 'phrul pa dang / 'khor chen por 'phrul pa ste bcu po de dag ni byang chub sems dpa' rnams kyi 'phrul pa chen por khong du chud par bya'o/ /zhes sogs dang / rdo rje gur las/ gang du snang nas kyang sems can gyi don mdzad do/ /so sor snang nas kyang sems can gyi don mdzad do/ /chang 'tshong ma dang / smad 'tshong mar snang nas kyang sems can gyi don mdzad do/ /zhes dang / mngon rtogs rgyan las/ gang gis srid pa ji srid par/ /'gro la phan pa sna tshogs dag /mnyam du mdzad pa'i sku de ni/ /thub pa'i sprul sku rgyun mi 'chad/ /ces bya ba la sogs pa yang dag pa'i lung dang / skyon med pa'i rig pa dang / shin tu zab pa'i man ngag du mas yid ches pa'i gnas su grub pa yin no/ /de lta bas na re zhig kun rdzob tshu rol mthong ba rnams kyi snang ngor so so skye bo'i rdo rje slob dpon mtshan nyid dang ldan pa'i skur sprul nas/ gangs ri'i khrod kyi gdul bya rnams yang dag pa'i grong khyer du bkri ba dang / thub pa'i dbang po'i bstan pa rin po che spyi dang bye brag thams cad zla 'od kyi thur mas phyes pa'i me tog ku mu dA'i tshal lam/ dbyar gyi mtsho bzhin du rgyas par mdzad pa'i rnam thar kho na'ang brjod kyis mi lang mod/ 'on kyang 'dir skabs su bab pa bdag cag tha mal pa rnams kyi blo ngor snang ba'i rnam par thar pa phyogs re tsam mchis pa rnams rang dang gzhan gyi rgyud la bsod nams dang ye shes kyi tshogs yongs su rdzogs par bya ba'i