[A:19]chad rgyal bas ma bsgral ba'i/ /'gro rnams thar pa mchog gi them skas la/ /'khrid pa'i ya mtshan gsar du ngoms pa gang/ /tshangs dang phur ba'i blos kyang gzhal nus min/ 4 /mgon de'i chos kyi khri 'phang mthon po na/ /zhabs sen 'khor lo'i re khA rnam bkod pa'i/ /smra dbang rnams kyis 'chad rtsod rtsom pa yis/ /thub pa'i bstan pa nyin mo'i dpal la sbyar/ 5 /lhag par grangs med bskal pa'i sngon rol du/ /mtha' gnyis spangs pa'i gzhal med khang pa na/ /khams gsum chos kyi rgyal po'i rgyal srid la/ /dbang bsgyur bdag cag rnams kyi 'dren pa gsum/ 6 /ji ltar padmo'i tshal du bung ba dang / /'o ma'i chu gter che la ngang mo bzhin/ /'gro la rjes su brtse ba'i 'dzum rlabs kyis/ /srid pa 'di na 'jug pa'i rol rtsed brtsams/ 7 /de lta'i mgon la gus pas bsngags pa yis/ /bde gshegs sras bcas dgyes pa'i gnad 'di kun/ /rtogs par bya phyir 'jig rten byed po yis/ /nyi dang zla ba'i dkyil 'khor sprul min nam/ 8 /dbang bskur mchog stsol rdo rje slob dpon gyi/ /ba spu'i khung bu tsam zhig bsnyen bkur ba'i/ /bsod nams de ni rgyal ba kun mchod pa'i/ /phan yon zil gyis gnon la chas pa bzhin/ 9 /gsal bar bya'o gzugs la lta ba'i mig /rin chen dang po las bskrun thur mas te/ /gang gi rnam thar ku mu dA yi tshal/ /tshogs gsum zla 'od gzhon nu 'dis kyang ngo / 10 /de ltar dgos pa don dang ldan pa'i gtam gyi sbyor ba me tog mandA ra'i phang phung lta bur g.yo ba cung zad sngon du gtor bas ngag gi lam yangs par byas nas/ da ni skabs su bab pa'i don dngos bshad par bya ste/ de la gsum/ mkhan chen thams cad