[A:21]bstan pa dang sems can gyi don rlabs po che mdzad pa'i tshul/ mkhas btsun bzang gsum sogs kyi yon tan bye brag tu bshad pa/ mthar gzugs sku'i bkod pa chos kyi dbyings su bsdus nas slar yang sems can gyi don rgyun mi 'chad pa'i tshul lo/ /de'i dang po la/ sku skye ba bzhes pa'i tshul dngos dang / gzhon nu'i sa la bzhugs nas mdzad pa ji ltar mdzad pa'i tshul gnyis las/ dang po ni/ 'di ltar de bzhin gshegs pa rnams mngon par byang chub pa'i gnas rgya gar rdo rje gdan gyi byang phyogs/ 'phags pa lag na padmo'i gdul zhing / dung dang kunda ltar dkar ba'i gangs ri mtho zhing lhun chags pa'i phreng bas bskor ba'i ljongs/ 'chi ba med pa'i yul du son ba ltar ha cang grang bar yang ma yin pa'i bsil ba'i reg bya 'jam pos skye bo rnams kyi lus sems la kun dga' gsar du skyed pa/ yid du 'ong ba'i ne'u gsing dang ljon shing gi tshogs du mas mdzes par spud pa'i khrod/ chu klung mang po phyogs tha dad du babs pa las sgra snyan par grags pas 'gro ba rnams kyi yid kyi brtan pa dbang med du 'phrog pa'i yul/ bod kha ba can zhes yongs su grags pa 'di la stod na mnga' ris skor gsum/ bar na dbus gtsang ru bzhi/ smad na mdo khams stod smad bar gsum ste khams gsum mam/ sgang drug tu yod pa las bar dbus gtsang ru bzhi/ de la'ang dbus na dbu ru dang g.yo ru gnyis/ gtsang na g.yas ru dang ru lag gnyis te ru bzhi las g.yas ru/ de la nyang stod dang nyang smad gnyis su yod pa las nyang smad kyi sa'i bye brag /rgyal ba sras dang bcas pa rnams