[A:23]rdzogs pa'i yab rta 'grin zhes bya ba dang / yum rdzong pa lags zhes pa gsang sngags rnying ma ba'i ring lugs 'dzin pa'i sngags 'chang mthu nus can rgyun ma chad par byon pa'i rigs su 'khrungs pa'i ye shes kyi mkha' 'gro'i mtshan dang ldan pa/ yid du 'ong ba'i lang tsho dang / ris su ma chad pa'i dad pa dang / nye ring med pa'i 'gro ba rnams la byams pa dang snying rje la sogs pa dam pa'i ngang tshul mang pos mdzes par spud pa'i pa sangs sgrol ma zhes pa ste/ yab yum de gnyis la sras bzhi dang / sras mo bzhi ste brgyad yod pa las/ sras thams cad kyi nang nas che shos padma don grub dang / de 'og zla rgyal zhes pa gnyis ni 'jig rten lugs kyi bstan bcos mtha' dag la mkhas shing / ya rabs kyi srol bzang po skyong ba zhig ste gnyis ka khyim pa'i brtul zhugs 'dzin pa yin la/ de 'og zhabs drung nam mkha' rab 'byams su grags pa ni/ chung ngu nas ngor du khu bo zhabs drung dpal ldan chos skyong gi drung du byon/ thugs rab kyi rtsal chen po rdzogs te nyin rer phyag dpe shog bu mda' tshad ma brgyad re tsam thugs la 'dzin pa la bsnyel pa mi mnga'/ gzhan yang ri mo dang / 'dag bzo la sogs pa bzo'i rig byed mang po ma bslabs par thol byung du mkhyen pa sogs smra ba'i khyu mchog chen por gyur pa zhig yod rung / gdul bya'i bsod nams kyis ma chun par dgung lo bcu bdun par zhing khams gzhan du gshegs/ de 'og sras thams cad kyi nang nas chung shos dpal sa yi steng na 'gran zla dang bral ba'i chos kyi rje 'di yin te/ de'ang thog mar yum gyi lhums su zhugs pa nas/ ji srid ma bltams kyi bar du yum sku lus