[A:24]yang zhing zo mdog bzang ba dang / sngar ma myong ba'i lus sems la bde bas khyab pa dang / dge ba'i bya ba la rang gi ngang gis 'jug pa sogs rgyal ba'i sras po rnams la ji ltar 'byung ba'i dge mtshan mtha' dag mngon du gyur bzhin pa'i ngang nas/ rgyud kyi rgyal po dpal dus kyi 'khor lo bod du phebs nas rab byung thog mar brtsis pa'i rab byung bcu gsum pa'i nang gses/ legs sbyar gyi skad du sirtha pa zhes bod skad du sa skyong ste rgya rtsis pa'i lugs kyi shing mo bya lo'i hor zla lnga pa'i dmar phyogs kyi gral tshes nyer lnga'i srod kyi dus su yum la gnod pa med cing ngo mtshar ba'i ltas du ma dang bcas te sku 'khrungs par gyur to/ /de ltar 'khrungs pa'i khye'u de ni gzugs bzang zhing lta na sdug pa/ bzhin gyi dkyil 'khor padma gzhon nu kha bye ma thag pa ltar kha dog rgyas shing / dbu gdugs kyi rnam pa can dang / dpral ba'i dbyes che ba sogs skyes bu chen po'i mtshan dang ldan zhing / skye bo rnams kyi yid kyi brtan pa dbang med du 'phrog pa zhig ste/ dus mnyam pa'i skye bo sus kyang 'gran du med pa yin no zhes thos la/ mtshan dgra 'dul zhes bya bar btags so/ /shel dkar zhu ba'i khu ba yi/ /tshon gyis lan brgyar byugs pa bzhin/ /mu tig 'od chags kha ba'i ljongs/ /lha yul sa la 'phos 'dra yod/ /khyad par dge mtshan rgya mtsho yis/ /yongs su gtams pa'i gling 'di ni/ /gangs can mdzes pa'i rgyan nyid du/ /dbang phyug gis ni sprul par nges/ /de na mkhas dang grub rigs kyi/ /'chi med lam las nyer 'ongs pa'i/ /rgyal sras skyed pa'i yab de la/ /rta mchog rol pa'i mtshan byin brlabs/ /yid 'ong shar gyi thig le ni/ /rin chen rgyan gyis rnam spras shing / /dad dang snying