[A:25]rje sogs ldan na/ /zla bzhin ma yi dpe zlar 'os/ /de lta'i ri dwags mig can ma'i/ /lus kyi pho brang nyams dga' bar/ /dge ba'i mtshan ma rab 'byams dang / /lhan cig zhugs pa'i rol rtsed brtsams/ /e ma rab tu mdzes pa'i lus/ /shing bal bzhin du yang ba dang / /zo mdog ches cher rgyas pa ni/ /yar gyi ngo la 'gran pa bzhin/ /sngon chad lhas kyang ma myangs pa'i/ /lus sems bde bas myos pa ni/ /mngon sum pa'am rmi lam zhes/ /yum gyi yid ni som nyir gyur/ /de nas nor gyi blo gros ma/ /dbyar gyi chas su zhugs pa dang / /'gro 'di'i bsod nams rwa ba na/ /gzugs sku'i me tog gsar pa bzhad/ /srid na mdzes pa'i snying po kun/ /gcig tu spungs la co 'dri ba'i/ /mtshan bzang lta na sdug pa yis/ /'jig rten gsum po kun yid 'phrog /de tshe ched du ma bos par/ /shis pa'i chos kun 'du ba dang / /'bad pa med par ljongs 'di yi/ /bde skyid dgung la reg par gyur// //gnyis pa gzhon nu'i sa la bzhugs nas mdzad pa ji ltar mdzad pa'i tshul ni/ de nas na tshod dang mthun pa'i kha zas phun sum tshogs pas skyed bsrings te/ cung zad mno shes pa na'ang gzhon nu de ni bskal pa dpag tu med par legs byas la goms pa brtas pa'i shugs kyis rgan pa la gus shing / gzhon pa la byams pa la sogs pa ya rabs kyi spyod tshul dang ldan zhing / rtsed mo dang ku re la sogs pa tha mal gyi byis pa'i spyod pa las 'das te/ zhi zhing dul ba dang / bag yod pa'i sgo nas kun spyod shin tu gtsang bas skye bo thams cad ngo mtshar ba'i gnas su gyur pa zhig go zhes 'khums so/ /de nas dgung lo lnga bzhes pa'i dus/ thar