[A:71]som nyi'i mdud pa thams cad grol bar mdzad la/ bsam pas sgro 'dogs chod pa rnams kyang snyan brgyud kyi gdams pa zab mos brgyan te rtse gcig tu thugs nyams su bzhes par mdzad de/ dgung lo bcu bdun par sa skya nas gsung ngag rin po che'i chos skor rnams gsan tshar ma thag ngor du byon nas/ dpal kye rdo rje'i gzhi'i bsnyen pa bcu cha'i sbyin sreg dang bcas pa stan thog gcig tu tshang bar mdzad cing / gnas skabs gzhan du'ang 'jam dkar bsnyen pa zla ba gcig tsam dang / 'byung 'dul gyi bsnyen pa zla ba gcig /'jigs byed kyi bsnyen pa zla ba gsum/ kun rig gi bsnyen pa zla ba drug rnams so so'i kha skong gi sbyin sreg dang bcas pa mdzad cing / 'jam dkar gyi sku mtshams skabs/ pusta ka mang po zhal du gsol ba'i mnal lam la sogs pa rtags mtshan khyad par can 'ga' zhig byung zhes rje rang gi zhal snga nas thos pa'i sku 'khor ba dag gi ngag las 'byung zhing / dus rgyun du'ang yi dam gyi lha mang po'i bskyed rim dang / rdzogs pa'i rim pa mtshan bcas dang / mtshan med kyi rnal 'byor dang / sngags bzla ba dang / gtor ma 'bul ba la sogs pa mdor na mnyam par gzhag pa dang / mnyam par ma bzhag pa'i rnal 'byor zab mos nyin mtshan khor yug tu 'da' bar mdzad de/ ji skad du/ chu bo'i rgyun ni rab 'babs dang / /mar me'i rtse mo rab bcings ltar/ /rtag tu de nyid rnal 'byor gyis/ /nyin dang mtshan du mnyam par bzhag /ces gsungs pa ltar mnyam rjes med par lha sngags ting nge 'dzin gyi rnam rol kho na las ma 'das pas/ tha mal gyi rnam par rtog pa cung zad kyang skye ba'i go skabs mi rnyed pa yin no/ /gzhan yang