[A:72]dgung lo bcu dgu pa mdzes byed kyi lor sa skya nas 'jam mgon rdo rje 'chang chen po de nyid zhing khams gzhan du 'gro don la gshegs pa'i tshul rnams gsan pas/ thugs kyi chu gter skyo ba'i rba rlabs drag po rab tu g.yos pa'i stobs kyis nyin grangs mang po'i bar du gsol dang 'gags pa sogs byung na'ang thugs rtse gcig pas gsol ba 'debs pa dang / bla ma mchod pa dang / rgyud sde nas bshad pa'i yi dam gyi lha mang po'i dkyil 'khor bzhengs te sgrub cing mchod pa dang / bdag nyid 'jug cing dbang blang ba la sogs pa'i sgo nas bsod nams kyi tshogs rgya cher spel bar mdzad do/ /nges 'byung khrims 'di sa bzhin du/ /yon tan kun gyi gzhir gzigs shing / /rten 'di las ni rgyal rnams kyang / /byang chub bdud rtsi bzhes mthong ste/ /'dir snang srid pa'i bde ba la/ /khyod kyis me 'obs ltar bltas nas/ /tsandan zla 'od bzhin bsil ba'i/ /so sor thar pa rab tu bzhes/ /khyad par byang chub sems dpa' dang / /rig 'dzin sngags kyi sdom pa yis/ /thugs kyi bang mdzod legs bkang ste/ /rgyal kun dgyes pa'i rnam thar bzung / /des na shes bya'i chos kun la/ /sbyangs pa'i ngal ba ston 'di ci/ /gzugs sku'i ljon bzang 'khrungs tsam nas/ /mkhyen pa'i lo 'dab rgyas min nam/ /'on kyang thams cad gzigs pa ni/ /shes rab mchog las 'khrungs pas na/ /de nyid mngon du 'gyur ba'i slad/ /thog mar thos pa bya bzhed nas/ /'jam dbyangs rigs su 'khrungs pa yi/ /'jam dbyangs mi yi zol 'dzin pa/ /'jam dbyangs de la gus btud nas/ /'jam dbyangs bzhin du rang yang byas/ /des kyang blo gros ma tshim par/ /da dung