[A:73]'dren pa gzhan rnams las/ /chos kyi bdud rtsi mang gsol bas/ /mkhyen pa'i lang tsho rgyas par mdzad/ /de lta'i mang thos skyed tshal na/ /bsam byung rig pa'i smin legs mas/ /zur mig yon por bskyod pa yis/ /ma nor don gyi mdza' bo bkug /tshul de sgom pa'i gom stabs kyis/ /rnam grol nor bu'i them skas la/ /dal gyis 'dzegs pa'i dge mtshan gyis/ /'khor ba ming gi mtha' ru bskyal// //gnyis pa tshigs phyi ma bsnyen par rdzogs pa dge slong gi dngos por bsgrubs te nyan bshad sgom gsum ji ltar mdzad pa'i tshul ni/ ji skad du dus 'khor rtsa rgyud las/ gsum las dge slong mchog yin te/ /'bring ni dge tshul nyid du brjod/ /khyim na gnas pa tha ma yin/ /ces pa ltar so sor thar pa'i sdom pa rigs brgyad kyi nang nas ches mchog tu gyur pa yongs su rdzogs pa'i dge slong gi dngos po bsgrub par bzhed nas/ dgung lo nyi shu pa 'phags pa'i yul na kro dhi zhes pa/ bod skad du khro mo ste rgya rtsis pa'i lugs kyi shing pho 'brug gi lo'i hor zla bzhi pa'i nang / sa la gnas pa'i 'og min chen po bod kyi rdo rje gdan dpal ldan sa skya'i chos grwa chen por phebs te/ 'dul ba'i lugs kyi dpyid zla gsum par 'dod pa snron gyi zla ba'am hor zla lnga pa'i yar ngo'i gral tshes bcu gnyis kyi snga dro'i char/ 'gro ba'i mgon po chos rgyal 'phags pa'i gzim chung lha khang bla brang du/ mkhan po bstan pa rin po che'i mnga' bdag brtan mkhas kyi yon tan mang po la dbang bsgyur ba'i lha khang mkhan chen byams pa sbyin pa bkra shis dpal bzang po dang / las kyi slob dpon bstan pa'i gsal byed dam pa byams pa