[A:85]pu pa/ /gsung ngag bdud rtsi'i gru char gyis/ /thar pa'i lo tog rgyas par byas/ /de sogs phrin las rmad byung bas/ /thub bstan dar la babs mdzad pa'i/ /ngo mtshar srid pa 'dir shong ba/ /khyod kyi rdzu 'phrul las gzhan ci/ /rno ba'i mtshon cha ma thog shing / /sra ba'i go yang ma bgos par/ /thugs rje'i cho 'phrul kho na yis/ /phas kyi rgol ba kun las rgyal/ /'jigs rung bdud sde'i rlung dmar gyis/ /gangs ljongs phal cher bskyod pa'i tshe/ /gang gi byin rlabs ra ba na/ /tshud kun bde ba'i rgyal srid zin/ /de lta'i grags pa mu tig dang / /kha ba dung ltar rab dkar ba/ /phyogs kun ri dwags mig can ma'i/ /mkhur tshos mdzes pa'i rgyan du byin// //gnyis pa sde dge chos rgyal chen pos spyan drangs te mdo khams smad kyi phyogs su byon nas bstan 'gro'i don ji ltar mdzad pa'i tshul ni/ mdo khams sde dge'i rgyal khab nas stobs kyi 'khor los sgyur ba yum tshe dbang lha mo dang / lha sras rin po che tshe dbang rdo rje rig 'dzin bcas kyis dbu'i mchod gnas zhig gdan 'dren ma zhus thabs med du dgongs shing / de'ang sngon gyi dus na sde dge'i rgyal rabs gong ma sgom ston bsod nams rin chen gyis chos kyi rgyal po 'phags pa rin po che'i gsol dpon gyi khur bzhes pa nas bzung sa skya pa'i bstan pa'i sbyin bdag tu gyur pa dang / de rjes mtshungs pa med pa'i bsod nams dang / stobs kyi bdag nyid sde dge bo thar gyi dus su/ ngor chen rdo rje 'chang gi zhal slob tu gtogs pa'i grub chen thang stong rgyal po nyid bla'i mchod gnas su bkur zhing / grub chen des lhun grub steng srib dgon gyi lha khang bzhengs pa sogs thog ma'i rten 'brel dang / khyad par gnod