[A:94] a tshe/ phyag tsha/ mang dge /'ju/ 'bum shul/ se shul sogs brgyud sga stod phyogs su tshar gsum tsam byon zhing / de dag so sor yang gdul bya rang rang gi mos pa dang mthun pa'i thun mong ba dang thun mong ma yin pa'i chos kyi 'od zer chen po rab tu bkyes te/ ma rtogs pa dang log par rtog pa la sogs pa'i gti mug gi mun pa stug po ni bsal/ 'dod chags kyi me phung 'bar ba ni zhi bar byas/ zhe sdang gi mtshon cha rnon po rnams ni legs par brtul te/ 'gro ba chos la ma dad pa rnams dad par byas/ dad pa rnams smin pa dang grol ba'i grong khyer chen por 'khrid pa sogs mdor na rgyal ba'i bstan pa rin po che phyogs thams cad du dar zhing rgyas par mdzad do/ /gzhan yang de skor gyi dgon pa dang / khyim bdag dad pa can rnams kyis gdan drangs pa'i ngor byon pa dang / lo bstar bzhin mi dbang yum rin po che dbyar gzigs dang / dza~M thog tu thog sdud phebs pa'i tshe/ rkyen sel gyi khrus dang tshe dbang sogs 'bul bar phebs dgos pa ma gtogs/ gzhan lhun grub steng gi phan bde kun khyab gling gi bla brang rang du bzhugs nas/ gtso bor mi bdag sa'i tshangs pa chen po sras yum rnams kyi dgongs bzhed ltar gyi dbang rjes gnang khrid/ lung la sogs pa gang dgos rnams 'bul ba dang / lo bstar bzhin dgon de'i drug cu dang / 'du ba chen po zhes pa ngor lugs dkyil 'khor bdun gyi sgrub mchod tshogs pa'i dbu bzhugs rnams sga stod du phebs skabs ma gtogs chag med dang / gzhan yang de dag gi bar skabs rnams su don du gnyer ba so so'i bsam pa dang mthun par/ so sor thar pa'i sdom pa rnams kyi rtsa ba lta bur gyur pa skyabs gsum