[A:༣༣༨]འཇིམ་པ་གཙང་མ་དང་ལྷན་ཅིག་ཏུ་བསྲེས་ཏེ། འཇིམ་པ་བྱིན་རླབས་སྔོན་དུ་འགྲོ་བའི་སྒོ་ནས་བླ་མ་ཡི་དམ་སངས་རྒྱས་བྱང་སེམས་ཆོས་སྲུང་ནོར་ལྷ་དང་བཅས་པའི་སྐུ་འདྲ་མང་དུ་སྤར་བཏབ་ཅིང༌། དེ་རྣམས་ལའང་རབ་ཏུ་གནས་པ་བརྒྱ་ཚར་འགྲོ་ངེས་བགྱིས་པ་དང༌། ཡང་གདུང་ཐལ་རྣམས་ལའང་གདུང་རུས་ཤིན་ཏུ་ཞིབ་པ་ཕྲན་བུ་འདྲེས་སྣང་བས། དེ་དག་ཀྱང་ཤིན་ཏུ་ཞིབ་པར་འདུར་ཏེ། དྲི་ཞིམ་པོའི་ཆུས་སྤྲུས་པའི་འཇིམ་པ་དང་བསྲེས་ཏེ། འཇིམ་པ་བྱིན་རླབས་སྔོན་དུ་འགྲོ་བའི་སྒོ་ནས། རིགས་ལྔའི་ས་བོན་དང༌། གཙུག་ཏོར་དྲི་མེད་ཀྱི་གཟུངས་དང༌། རྟེན་འབྲེལ་སྙིང་པོ་བཅས་ཀྱི་གཟུངས་གཞུག་དང་ལྡན་པའི་སཱཙྪ་འབུམ་ཐེར་ཅུང་མེད་ཙམ་བཞེངས་ཤིང༌། དེ་ཐམས་ཅད་ལའང་རབ་ཏུ་གནས་པ་བགྱིས་པ་དང༌། ཁྱད་པར་ལོ་དེའི་ཧོར་ཟླ་དགུ་པའི་ནང་ཕྱི་རྟེན་ཁང་བུ་བརྩེགས་པའི་མཆོད་རྟེན་བཞེངས་པར། ཐོག་མར་ས་ཆོག་མདོར་བསྡུས་དང༌། ས་བདག་ལྟོ་འཕྱེའི་ཐིག་དང༌། གཏེར་བུམ་འཇུག་པ་སོགས་སྔོན་དུ་འགྲོ་བའི་མཆོད་རྟེན་གྱི་ཕྱགས་ཚད་རྣམས་ངོར་ཆེན་རྡོ་རྗེ་འཆང་ཡབ་སྲས་ཀྱི་བཞེད་པ་ཇི་ལྟ་བ་བཞིན་དུ་བགྱིས་པ་དང༌། དེའི་ནང་དུའང་མཚན་ཉིད་དང་ལྡན་པའི་སྲོག་ཤིང་ལ་ཇི་སྐད་བཤད་པ་ལྟར་གྱི་གཟུངས་འཇུག་པ་དང༌། འབྲི་བ་སོགས་དང༌། ཁྱད་པར་བླ་མ་བརྒྱུད་པའི་མཚན་འབུམ་ནས་བཟུང༌། ཆོས་སྲུང་ནོར་ལྷ་དང་བཀྲ་ཤིས་ཀྱི་བར་ཐམས་ཅད་གོ་རིམ་མ་འཕྱུགས་པ་གོང་མའི་ཕྱག་ལེན་ཇི་ལྟ་བ་བཞིན་དང༌། འོག་ཏུ་གནོད་སྦྱིན་འཁོར་ལོ་དང་ནོར་ལྷའི་གཏེར་བུམ་བཅས་དང༌། ཁྱད་པར་སཱཙྪ་རྣམས་ཀྱང་ཡོངས་སུ་རྫོགས་པར་བཞུགས་སུ་གསོལ་ཞིང༌། དེ་དག་ཀྱང་ས་རྡོ་སྤུངས་པ་ལྟ་བུ་མ་ཡིན་པར་རེ་རེ་ནས་པད་སྤུངས་མཆོད་རྟེན་ཤར་དུ་བསྟན་ཏེ་བསྒྲིགས་པ་དང༌། སྟར་རེ་བསྒྲིགས་ཚར་བའི་རྗེས་སུ་སཱཙྪ་རབ་གནས་མདོར་བསྡུས་