[A:158]zer zhing ngo mtshar du 'dzin pa byung / de nas mi 'phrogs pa'i mkhyen rab phul du phyin pa'i me tog bkra zhing / thugs rje'i yal ga ring por rkyong pas skye rgu thams cad kyi re ba yongs su 'gengs pa'i rnam 'dren dpag bsam gyi ljon pa mkhan chen rdo rje 'chang byams pa nam mkha' 'chi med kyi zhabs pad legs par bsten cing / gus pa'i kun spyod kyis mnyes par byas te/ yi ge'i phyi mo nas bzung 'bri klog sogs bka' khrid zhus pa tsam gyis tshegs med du mkhyen/ de nas dgung lo bco lnga'i bar la e wa~M pa'i 'don chog yongs su rdzogs pa thugs 'dzin dang / de dag gi go don dang cho ga'i phyag len tha na gdangs dbyangs tshun chad dpyis phyin par mdzad/ khyad par sa paNDita chen pos mdzad pa'i bstan bcos sdom gsum rab dbye/ rje dkon mchog lhun grub kyis mdzad pa'i rgyud bshad kyi sngon 'gro tshul gsum mdzes rgyan dang / rgyud kyi mngon par rtogs pa ljon shing mdzes rgyan/ dpal kye rdo rje'i rtsa ba'i rgyud brtag pa gnyis pa ste ngor pa'i gzhung chung bzhir grags pa dang / rje dkon mchog lhun grub kyis mdzad pa'i gsung ngag lam 'bras kyi sngon 'gro snang gsum mdzes rgyan/ dngos gzhi rgyud gsum mdzes par byed pa'i rgyan bcas thugs 'dzin gnang ste e wa~M bla brang du rgyugs 'bul bar mdzad/ e wa~M du lo dar bzhin bde kye gsang gsum gyi rgyud nas bstan pa'i bla med kyi dkyil 'khor chen po lnga'i sgrub mchod mdzad pa'i nang tshan bde mchog lU nag gi cho ga'ang lo bzhi tsam gyi bar du gtong bar mdzad/ de nas dgung grangs bco lngar son pa lcags khyi lor/ mkhan chen rdo rje 'chang byams pa nam mkha' 'chi med sa skyar khri mjal la phebs pa dang lhan cig /rje 'di'ang bod kyi rdo rje gdan dpal ldan sa skya'i chos grwa chen por phebs te/ der bzhugs pa'i bdag chen 'jam pa'i dbyangs sku ngo