[A:159]khag dang / rten gsum thams cad zhib par mjal/ khyad par khu bo mkhan chen rdo rje 'chang chen pos 'jam mgon dbang sdud snying por rje 'di la mtshan zhig stsal dgos pa'i snyan sgron phul ba na/ des kyang thugs dgyes pa'i 'dzum dkar g.yo bzhin pa'i ngang nas mtshan byams pa kun dga' bstan 'dzin zhes bya bar 'dogs par mdzad do/ /de nas rang gnas e wa~M chos ldan du phebs shing khyim gyi bde 'byor la chags pa ni thar pa'i go skabs med pa'i me 'obs stug po'i nang na gnas pa lta bu dang / rab tu byung ba rnams ni bsil khang na gnas pa lta bu'i 'du shes 'khrungs shing / khyad par du'ang 'phags mchog klu sgrub kyis/ khrims ni rgyu dang mi rgyu'i sa bzhin du/ /yon tan kun gyi gzhi rten lags par gsungs/ /zhes gsungs pa ltar yon tan kun gyi gzhir gyur pa ni tshul khrims kyi bslab pa nyid yin par dgongs te/ mdor na nges par 'byung ba'i thugs kyi kun slong rnam par dag pas kun nas bslangs te lo der de dus gangs khrod kyi 'dul ba 'dzin pa rnams kyi gtsug gi nor bu lta bur gyur pa khu bo mkhan chen thams cad mkhyen pa chen por mkhan po zhus shing / gzhan yang las byed pa'i dge slong grangs tshang pa'i dbus su yongs rdzogs dge bsnyen gyi sdom pa dang / khyim pa'i rtags thams cad mchil ma'i thal ba ltar bor te rab tu byung ba'i rtags dang cha lugs la sogs pa yang dag par len pa bar ma rab byung sngon du 'gro ba'i sgo nas dngos gzhi dge tshul gyi sdom pa rnam par dag pa legs par bzhes par mdzad do/ /de phyin chad 'di snang srid pa'i bsam sbyor mtha' dag dug can gyi kha zas bzhin du rgyang ring du dor nas/ rang gzhan gyi don du rnam par grol ba'i yon tan kho na don du gnyer ba'i sgo nas/ ji skad du kA ri ka sum brgya pa las/ gang zhig srog