[A:274]dgyes nyams che zhing / mdangs rmi lam du rang re'i bla brang gi shar gyi rtsig rmangs 'di zhig la khad du snang ba sems mi bde ba'i nyams kyis gnyer pa mkhyen rab la 'di bcos dgos tshul mol bas de ma thag las mi kha shas dang bcas rtsig pa sra brling zhig 'phral du grub song ba da ste lo shas brtan par 'dug snyam yid bde bar byung ba la dpags na/ da res nad 'dis skyon mi 'dug cing / da dung lo shas 'tsho ba 'dra zhes bka' stsal ba ltar/ de 'phral sku khams rim gyis dwang ste sku'i gzi byin sngar bzhin rgyas pa dang / bstan 'gro'i dpal du zhabs pad yun ring por 'tsho zhing gzhes pa'i dge mtshan mngon du gyur/ de skabs sde dge rgyal sras bla ma rin po che dbus gtsang gi phyogs su bsnyen bkur stob bzhin pa'i sgo nas e wa~M du phebs/ des gsol ba btab pa ltar rje nyid kyis mkhan po dang / mkhan chen bla ma rnal 'byor 'jam dpal bzang pos las kyi slob dpon mdzad de bdag cag la sogs pa dad pa'i dge 'dun grangs tshang ba'i dbus su rab tu byung zhing bsnyen par rdzogs pa dang / gsung ngag rin po che lam 'bras slob bshad kyi smin grol cha lag yongs su rdzogs pa lan cig dang / dbang dang rjes gnang zur bka'i rigs kyang kha shas stsal/ de lo 'jam pa'i dbyangs mkhyen brtse'i dbang po'ang sde dge dang lhan cig tu mdo khams su byon/ de nas bzung ste dgung grangs gya gnyis pa me sbrul lo'i bar gtso bor thugs dam kho na la gzhol bar mdzad cing / snga phyir bdag gis gsol ba btab pa'i ngor/ rigs gsum spyi dang / 'phags pa bcu gcig zhal lha so bdun dang / gdugs dkar lha nyer bdun ma dang / srung ba lha lnga bcu rtsa gcig dang / 'jam