[A:160]gcod gzhan gyi nor 'phrog dang / /mi tshangs spyod rdzun bcos pa'i chang la sogs/ /gar sogs phreng sogs mal che mtho ba dang / /phyi dro'i kha zas dngul nyid spong ba ni/ /nyon mongs dgra g.yul rgyal byed tshul khrims te/ /dge tshul brtul zhugs chu lon brtsigs pa dang / /'chi ba'i mche ba 'byin par byed pa'i thabs/ /rdzogs pa'i byang chub dpal nod dbang bskur yin/ /zhes pa ltar gyi dge tshul gyi bslab pa'i gzhi bcu char gtogs dang bcas pa mtha' dag phra zhing phra ba nas mig 'bras bzhin du srung bar mdzad do/ /byang chub sems dpa'i sdom pa ni khu bo mkhan chen byang chub sems dpa' de nyid kyi drung nas kyang brgyud pa'i khyad par gnyis ldan gyi sems bskyed gsan cing / gzhan yang rgyal ba'i sras po ngag dbang bstan pa rin chen sogs las brgyud pa'i khyad par gnyis ldan gyi sems bskyed gsan te/ de phyin chad nag po'i chos bzhi spong zhing de'i gnyen por dkar po'i chos bzhi sgrub pa dang / gzhan yang pham pa lta bu'i chos bzhi dang / nyes byas bzhi bcu zhe drug dang / nam mkha'i snying po'i mdo las gsungs pa'i byang chub sems dpa' rgyal po la 'byung ba'i ltung ba gcig /blon po la 'byung ba'i ltung ba gcig /rgyal blon thun mong du 'byung ba bzhi/ byang chub sems dpa' las dang po pa la 'byung ba brgyad dang bcas pa thams cad kyang srung sdom gyi ra ba las nam yang mi 'da' bar mdzad pa yin no/ /gsang ba sngags kyi sdom pa ni/ gnas skabs de nyid du rigs dang dkyil 'khor kun gyi khyab bdag rdo rje sems dpa' dang dbyer ma mchis pa khu bo mkhan chen de nyid kyi drung nas/ rgyud ma smin pa smin par byed pa dpal kye rdo rje man ngag lugs kyi dbang bskur ba legs par gsan cing / gzhir gnas pa'i rdo rje bzhi la sku bzhi'i sa bon btab ste/ dbang gis mtshon