[A:286]ngor lugs dkyil 'khor bdun la sogs pa'i cho ga mang po nag 'gros su mdzad de spar du spel ba dang / dge 'dun gyi sde chen po gsar du btsugs te 'jam dbyangs sa skya pa'i rang lugs gsal bar byed pa'i sdom gsum gyi bstan bcos gtsos legs bshad ji snyed spel ba dang bcas bshad sgrub kyi rgyun 'dzugs pa sogs dpal sa skya pa chen po'i bstan pa'i srog shing gcig pur gyur te phrin las nam mkha' dang mnyam par gyur ro/ /de lta bu'i mkhas pa chen po rnam pa gnyis kyis dpal sa skya pa'i bstan pa rin po che dar zhing rgyas par mdzad pa'ang bdag cag gi dpal ldan bla ma dam pa nges pa don gyi rdo rje 'chang chen po 'di'i phrin las kyi rgyun las byung ba yin par shes par bya'o/ /gzod nas de bzhin gshegs kun gyis/ /srid zhi'i bla mar dbang bskur ba/ /gang de slar yang gzengs bstod pa'i/ /'gro 'di'i blo gros shin tu 'khrul/ /'on te tshur mthong mgu ba'i slad/ /chen po'i go sar mnga' gsol ba/ /de dag kun gyi blo de yang / /khyod kyi rnam 'phrul las gzhan ci/ /e ma che rgu'i gtsug tor rtser/ /zhabs kyi chu skyes nyer bkod pa/ /bde 'byung gtsug na mdzes pa yi/ /zla shel bzhin du rnam par mdzes/ /de lta'i ngo mtshar nyin byed kyis/ /byis blo'i padmo rgyas gyur kyang / /dpyod ldan rnams ni de tsam du/ /ya mtshan kunda bzhad ma lags/ /khyod kyi 'byor pa mi zad pas/ /snyigs ma'i rgud pa kun 'phrogs te/ /rdzogs ldan lta bur bgyis pa 'dis/ /byed po'ang pham par byas kyis dogs/ /de ltar mod kyi rgyal sras rnams/ /rang gi spyod tshul spyod pa la/ /ha cang mtshar du brtsi ba yi/ /blo de byis pa yin snyam bgyid/ /rgyal