[A:289]rnams rang gi bstan pa la/ /btang snyoms mdzad pa'i dus mtha' 'dir/ /khyod kyi phrin las shing rta yis/ /mkhas pa'i nyi gzhon rnam par drangs/ /de lta'i smra ba mchog rnams kyis/ /thub bstan nyin bzhin spel ba ni/ /rkang gnyis gtso bo 'jig rten 'dir/ /byon pa'i dus la 'gran par bzhin/ /de slad mgon khyod yon tan la/ /rgyal dang khyad par ma mchis kyang / /snyigs dus bstan pa spel ba la/ /rgyal ba las kyang lhag par mthong / /khyod kyi thun mong ma yin pa'i/ /ngo mtshar rmad byung khab len gyis/ /mkhas rnams yid kyi lcags phye ni/ /lan cig min par kun tu sdud// //spyi don lnga pa chos kyi 'khor lo bskor ba'i grub 'bras bstan 'dzin gyi slob ma ji tsam byung ba'i tshul ni/ snyigs dus kyi thams cad mkhyen pa 'jam pa'i dbyangs mkhyen brtse'i dbang po'i zhal snga nas mdzad pa'i rnam thar gsol 'debs las/ yongs rdzogs bstan pa'i mnga' bdag thams cad mkhyen/ /dpal ldan sa skya'i 'jam mgon yab sras sogs/ /gangs can mkhas grub kun gyis phyag byas shing / /gsung gi bdud rtsi gzhes la gsol ba 'debs/ /zhes gsungs pa ltar/ dam pa 'dis ni zang zing la mi blta ba'i byams pa dang / 'khor ba las sgrol 'dod kyi snying rje chen pos kun nas bslangs te/ ji skad du/ mdo ting 'dzin rgyal po las/ 'phral du brjod par mi bya yi/ /snod la brtag pa byas nas bya/ /gal te snod ni shes gyur na/ /gsol ma btab kyang bshad par bya/ /'khor ni mang po 'khod nang du/ /gal te ngang tshul ngan mthong na/ /khyod kyis yo byad bsnyungs mi bshad/ /