[A:288]sbyin pa'i bsngags pa brjod par bya/ /gal te 'dod pa chung zhig ste/ /tshul khrims dag par gnas yin na/ /khyod kyis byams pa'i sems bskyed la/ /yo byad bsnyungs ba'i gtam gyis shig /gal te sdig 'dod chung gyur cing / /tshul khrims ldan pa mang gyur la/ /gnyen po rnyed pa de yi tshe/ /tshul khrims bsngags pa brjod par bya/ /zhes sogs gsungs pa ltar gdul bya rang rang gi snod dang bstun te ngal ba dang dub pa'i rnam pa cung zad kyang mi mnga' bar gong du ji skad bshad pa ltar gyi gsung ngag rin po che lam 'bras tshogs bshad tshar bcu dang / slob bshad tshar drug ste bcu drug dang / rdo rje phreng ba'i dbang tshar gnyis/ kye rdor bka' babs bzhi'i dbang tshar drug la sogs pa mdor na rje rang gis gang gsan pa'i zab pa dang rgya che ba'i chos mtha' dag lan grangs mang po'i bar du stsol bar mdzad pa la brten/ zhal slob kyang stod mnga' ris skor gsum/ bar dbus gtsang ru bzhi/ smad mdo khams sgang drug rnams nas gdul bya skal ba dang ldan pa sprin bzhin du 'dus pa rnams re re nas smos kyis mi lang mod/ mdor bsdu ba'i dbang du byas te brjod na/ gangs ljongs skye rgu'i skyabs gcig sa skya 'khon gyi gdung brgyud du 'khrungs pa lnga/ rgyal bas lung gis bsngags pa'i ngor chen rdo rje 'chang chen po'i chos kyi khri la zhabs sen rnam par bkod pa drug /'jig rten gyi khams na 'gran zla dang bral ba'i mkhas pa chen po 'dzam gling mdzes par byed pa'i rgyan lnga/ kun mkhyen e wa~M pa chen po'i ring lugs 'dzin skyong spel gsum byed pa la rab tu chas pa'i zhabs drung rnam pa brgyad/ bstan pa stobs kyis 'dzin pa'i chos rgyal chen po yab sras bzhi