[A:289]gtso bor gyur pa'i rgyal rigs du ma/ stobs dang 'byor pas sgeg pa'i mi chen du rlom pa mang po/ rgyal po'i bla'i mchod gnas su mnga' gsol zhing zab rgyas kyi chos tshul ston pa bdun/ 'chad rtsod rtsom gsum la dbang 'byor pa'i bshes gnyen lung rig smra ba drug /dgon sde so so'i mkhan po dang slob dpon dang sprul sku dang chos rje'i rigs mang po/ rtse gcig tu sgrub pa'i rgyal mtshan 'dzin pa'i rnal 'byor pa mang po/ sdom pa gsum char gyi bka' drin rdzogs par nos pa'i slob ma sum stong tsam/ chos 'brel tsam zhus pa'i slob ma grangs las 'das pa rnams su yod pa las/ dang po gangs ljongs skye rgu'i skyabs gcig sa skya 'khon gyi gdung brgyud du 'khrungs pa lnga ni/ mkhas dang grub pa'i gtsug rgyan yab rje grub pa'i dbang phyug ngag dbang kun dga' bkra shis mthu stobs bstan 'dzin bzang po/ mtha' klas bstan 'gro'i dpa' mgon 'jam dpal ngur smrig 'dzin pa mgon po 'dis dbang re zung las bka' chos che rigs ma gsan dngos grub dpal 'bar/ gter ston mchog gyur bde chen gling pa'i zab gter las sna nam rdo rje bdud 'joms kyi rnam 'phrul du lung bstan pa'i sngags 'chang bla ma khri chen thams cad mkhyen pa ngag dbang bkra shis rin chen theg mchog bstan pa'i rgyal mtshan/ smin grol gdams pa rgya mtsho'i gter gyur sngags 'chang ngag dbang kun dga' bsod nams/ 'jam dpal ngur smrig rnam rol gdung sras phyogs kyi glang po dang lnga'o/ /gnyis pa rgyal bas lung gis bsngags pa'i ngor chen rdo rje 'chang chen po'i chos kyi khri la zhabs sen rnam par bkod pa drug ni/