[A:291]char gyi yon tan phul du son pa rdo rje 'chang rin chen blo gsal bstan skyong dpal bzang po'i zhal snga nas dang / brtse chen snying po'i zhabs kyi ring lugs 'dzin skyong spel gsum byed pa la kun mkhyen e wa~M pa nyid dang rnam dbyer med pa'i gnas lnga rig pa'i mkhas pa chen po 'jam pa'i dbyangs ngag dbang legs grub bam mtshan gzhan ngag dbang blo gros snying po gzhan la phan pa mtha' yas pa'i 'od zer du grags pa'i zhal snga nas dang / zhwa ser gyi cod pan 'dzin pa rnams kyi gtsug gi nor bu lta bur gyur pa a mdo bkra shis 'khyil gyi brag dgon zhabs drung rin po che bcu phrag rig pa'i ma hA paNDi ta chen po dkon mchog bstan pa rab rgyas kyi zhal snga nas dang / mnyam med ri bo dge ldan pa chen po'i bstan pa'i snang byed mtshungs zla dang bral ba lnga rig smra ba'i dbang po sog po don grub rgyal mtshan pa rnams so/ /dus 'di tsam na mkhas pa chen po de dag gi phrin las kyis bod dang bod chen po'i ljongs thams cad mdzes par byas pa yin no/ /bzhi pa kun mkhyen e wa~M pa chen po'i ring lugs 'dzin skyong spel gsum byed pa la rab tu chas pa'i zhabs drung rnam pa brgyad ni/ rje 'di'i sku'i dbon po mkhas btsun bzang gsum gyi yon tan bsam las 'das pa bdag cag gi dpal ldan bla ma dam pa zhabs drung rin po che 'jam dbyangs nam mkha' rgyal mtshan pa dang / dpal brtse ba chen po'i sku zhang shar pa'i rigs su sku 'khrungs pa'i klu ldings zhabs drung rin po che ngag dbang ye shes rgyal mtshan pa dang / de'i sku'i dbon po mdo sngags bstan pa'i snang byed klu lding zhabs drung rin po che shes rab chos kyi rgyal mtshan pa dang / de'i sku mched lung rtogs yon tan rgya mtsho'i bdag