[A:298]pa 'di ni bskal ba dpag tu med pa'i sngon rol nas byang chub mchog tu thugs bskyed cing / de'i bslab par bya ba mtha' dag tshul bzhin du bslabs pa la brten/ sku tshe 'dir yang thog ma nyid nas theg chen gyi rigs sad pa'i stobs kyis byang chub kyi sems rin po che rnam pa gnyis thugs rgyud la rang shugs kyis 'khrungs shing / gzhan la phan pa kho na lhur mdzad pa yin la/ khyad par sems bskyed kyi sdom pa gsan tshul chad de nas bshad pa'i dkar po'i chos bzhi la sogs pa'i bslab bya mtha' dag sgrub pa dang / nag po'i chos bzhi la sogs pa'i spang bya thams cad spong ba dang / gzhan yang ltung ba dang / ltung med dang / ltung ba'i gzugs brnyan dang / ltung med kyi gzugs brnyan rnams kyang ma nor bar mkhyen bzhin pa'i sgo nas blang dor tshul bzhin du mdzad pa dang / gal te ltung ba phra mo tsam 'byung srid na'ang phung po gsum pa la sogs pa'i sgo nas bshags bsdam tshul bzhin du mdzad pas rgya mtsho chen po ro dang mi 'grogs pa bzhin du nyes pas mi gos pa yin no/ /gzhan yang mgon med pa dang / skyabs med pa dang / dpung gnyen med pa'i sems can nyam thag pa dag gzigs pa'am gsan pa tsam gyis rang dbang med par spyan chab 'byung zhing / de dag la phan pa'i thabs kho na lhur mdzad pa dang / dbul zhing phongs pa rnams gzigs pa'am gsan ma thag tu ji ltar 'dod pa'i zas dang gos la sogs pa lhug par stsol ba dang / rje rang gi zhal nas kyang / nged la bzang po byung bas dga' tshor dang / ngan pa byung bas sdug rgyu med pa zhig yod pa yin zhes bka' stsal ba ni 'jig rten chos brgyad mgo snyoms shing / rang 'dod kyi 'khri ba dang bral ba ste/ de la brten nas skye bo