[A:299]ngan pa rang gis rang nyid ngan song du lhung bar byed pa kha cig gis skur pa 'debs pa dang / log sgrub sgo du ma nas brtsams kyang de dag la thugs 'khrugs pa med par slar yang lhag par brtse ba'i sgo nas gnod len du phan 'dogs pa sogs byang chub sems dpa' sems dpa' chen po'i spyod tshul las nam yang g.yo ba med pa yin no/ /khyad par gsang sngags rdo rje theg pa'i rgyud sde chen po bzhi dang 'brel ba'i dbang bskur ba rnams legs par gsan phyin chad bya ba'i rgyud kyi spyi'i dam tshig gsum/ khyad par gyi dam tshig bcu gsum/ spyod pa'i rgyud la thun mong ma yin pa'i dam tshig bzhi/ rnal 'byor gyi rgyud la khas blangs kyis thob pa rigs lnga spyi dang so so'i dam tshig /cho gas thob pa'i dam tshig dpal mchog nas bshad pa bcu/ rdo rje 'byung ba nas bshad pa gcig ste bcu gcig /rnal 'byor bla na med pa'i rgyud kyi dbang bzhi so so'i dam tshig rnams kyang srung sdom gyi ra ba las nam yang mi 'da' bar mdzad cing / de'i ngang nas dngos grub thams cad kyi rtsa ba dpal ldan bla ma dam pa rnams dang lhag pa'i lha tha mi dad par 'du shes pa'i sgo nas thugs dad bsam gyis mi khyab pas gsol ba 'debs pa dang / gong du bshad pa'i yi dam gyi lha'i ljags bsnyen rnams mdzad pa dang / dus rgyun gyi thugs dam nyams bzhes kyi rim pa'ang lta ba 'khor 'das dbyer med kyi nyams len gyi gnad zab mo dang ma bral ba'i sgo nas lam zab mo bla ma'i rnal 'byor dang / dpal kye rdo rje phyi nang sbrags ma'i mngon rtogs lam dus kyi dbang blang ba dang bcas pa shin tu rgyas pa dang / rnal 'byor dbang phyug gi srung ba dang / nA ro mkha' spyod ma ste sa skya pa'i chag med bzhir grags pa rnams dang / 'jam dbyangs dkar po dang / dbyangs can