[A:307]'dis de tsam gyi skyon mi 'ong ba'i tshul gsungs pa'ang de kho na ltar mngon du gyur pa sogs de 'dra'i rigs can shin tu mang / spyir yang rgyun par thugs brtag zhu ba'i tshe ni ci'ang mi mkhyen pa'i tshul gyis 'jam dbyangs rdel mo sogs la nan tan du gzigs te de nas 'byung ba bzhin lung ston par mdzad la/ de'ang ji ltar gsungs pa bzhin thog tu khel ba kho na 'byung mod/ /de bas kyang skabs 'gar thol byung du bka' stsal pa rnams shin tu tig che bar snang zhing / de la brten nas sde dge chos rgyal chen po sogs zhal slob dang sbyin bdag rgyus yod pa phal che bas ni thugs brtag zhu ba las gsung sgros kyi tshig zur la brtag pa nyid legs zer ba kho na 'byung / mdor na mngon par shes pa thogs med du mnga' bar gdon mi za na'ang / bdag cag so so skye bo rnams kyi snang ngo dang mthun par ci'ang mi mkhyen pa'i tshul 'ba' zhig mdzad par mngon/ gzhan yang sku dngos kyis dbang bskur ba dang / byin gyis brlabs pas ni 'gal rkyen las grol ba smos ci dgos/ ljags chab dang gsang chab tshun gyis kyang skye bo mang po nad gdon las grol ba sogs ngo mtshar ba'i rnam thar bsam las 'das pa yin no/ /mdor na rang nyid spangs pa dang rtogs pa'i yon tan bsam gyis mi khyab pa la dbang 'byor yang / rgyags pa dang dregs pa lta ci/ skye bo dman pa shin tu nyam chung ba tshun chad la'ang zhe sa dang bcas pa'i gtam gyis mgu par mdzad cing / de la brten nas mtshan dpe rjes mthun pa thob pas blta bas chog mi shes par mdzes shing brjid chags la tshul khrims kyi dri bsung ring du 'thul ba'i sku mthong ba dang / gdul bya so so'i blo dang 'tshams par 'dod rgur 'char bas rna bar