[A:314]mgo 'degs shing / dkar po'i phyogs kyi lha dang srung mar bcas pa mtha' dag yid mi dga' zhing mya ngan gyi chu tshan snying gi dbus nas khol ba'i ltas dang / de la brten nas phyogs 'dir rjes su brtse ba'i skyob pa rnams kyang thugs skyo ba'i tshul bstan par mngon la/ rnam pa gcig tu na/ skyes bu dam pa 'di lta bu 'jig rten du byon pa na de'i bsod nams kyis 'jig rten thams cad bde bar 'tsho zhing / de nyid gzhan du gshegs pa na 'jig rten 'dir mi dge ba 'byung ba chos nyid yin te/ sngon rgyal po zla 'od kyi dbu sbyin par gtong ba'i tshe/ 'dzam bu'i gling gi mi thams cad kyi mgo bo'i rgyan dus gcig tu sa la lhung zhing sa g.yos pa dang / skar mda' ltung ba dang / bkra mi shis pa sna tshogs byung zhing / mi rnams kyang tshe'i dus byas nas lha'i gnas su skyes so zhes grags pa dang / bod 'dir yang 'jam pa'i dbyangs dngos chos kyi rgyal po khri srong lde'u btsan 'das pa na lo nyes dang / 'khrugs long byung bar grags pa sogs mdor na gang zag dam pa phal che ba zhing gzhan du gshegs pa'i tshe de ltar byung ba'i tshul mang du bshad pa'i phyir ro/ /gzhan yang bdag cag gi dpal ldan bla ma dam pa 'di dus rgyun du'ang spyir mkhyen rab kyi klong che zhing / gsung sgros sogs kyang brjid chags zhing yid du 'bab pa zhig yod par ma zad/ lhag par lcags bya lor sku bsnyun pa'i tshul bstan pa nas bzung sngar bas kyang gsung sgros rnams brjid chags shing / mkhyen rab kyi klong yang cher song ba lta bur snang ba dang / mngon par shes pa'ang dus rgyun dang cung mi 'dra ba'i thogs pa med par snang ste/ rje rang gi zhabs 'bring bas rin chen ril bu zhig zhus par/ sde dge bla chen byams pa kun dga' sangs rgyas bstan pa'i rgyal mtshan gyi