[A:163]bla brang gzhung du mtshan brjod par dka' ba don gyi slad du mtshan nas smos na/ mkhan po brtan mkhas kyi yon tan du ma la dbang bsgyur ba byams pa nam mkha' 'chi med bkra shis grags pa'i rgyal mtshan dpal bzang po dang / las kyi slob dpon legs par gsungs pa'i chos 'dul ba la mkhas shing / de'i bslab pa'i gnas mtha' dag ston pa la rnam dpyod kyi mgrin pa yangs pa dpon slob rin po che ngag dbang dam chos pa dang / gsang ste ston pa'i slob dpon gnas brtan 'dul ba 'dzin pa bsod nams tshul khrims la sogs pa dad pa'i dge 'dun bcu'i dbus su rje 'di dang phan khang zhabs drung rin po che ngag dbang bstan pa rin chen gnyis kyis bsnyen par rdzogs pa dge slong gi sdom pa rnam par dag pa legs par bzhes par mdzad do/ /de'i tshe skyes bu dam pa 'di rab tu byung bas sangs rgyas kyi bstan pa dang lha'i phyogs ni zla ba yar gyi ngo bzhin du 'phel bar gyur la/ nag po'i phyogs dang lha ma yin rnams ni mar gyi ngo bzhin du 'grib par gyur to/ /de lta bu'i snyan pa'i grags pas sa'i steng thams cad khyab par gyur cing / sa bla'i lha rnams kyis rgyal chen ris bzhi pa'i lha rnams dang / rgyal chen ris bzhi pa rnams kyis sum cu rtsa gsum pa rnams la bsgrags shing / de bzhin du 'og min gyi bar du bsgrags par gyur te/ mdo dran pa nye bar gzhag pa las skyes bu dam pa rnams rab tu byung ba'i tshe 'di lta bu 'byung bar bshad pa'i phyir ro/ /dus de nyid nas bzung ste bsnyen par rdzogs nas lo brgya lon pa'i dge slong gi dngos po dang 'dra bar gyur te zhi zhing dul la bag yod pa'i sgo nas ltung ba sde lnga char gtogs dang bcas pa'i dri ma mtha' dag dang bral zhing / gnyen po'i khrims nyis brgya lnga bcu rtsa gsum char gtogs dang bcas pa las nam