[A:319]bzhes par sems la/ gzhan yang chos kyi bgro gleng 'dra'ang ci rigs par mdzad pa dang / de rjes tshes bcu gsum gyi nub mo shin tu sku bsnyel ba zhig byung song zhing / khyad par tshes bcu bzhi'i snga dro nyi ma rtse shar tsam na sku lus la sra bzung rgyu med cing / gsung sgros stsal ba rnams kyang cher mi go ba dang / phyag rtsa'ang gtan nas med pa lta bur snang bas/ bdag cag rnams ni ci bya gtol med du gyur te/ kye ma da ni bdag cag skal med rnams kyi bsod nams kyis mi 'chun par thag chod do snyam pa shar zhing / bdag gis skyabs rje rdo rje 'chang chen po da dung yang zhabs pad yun ring du brtan par gsol ba 'debs pa lags mod/ 'on kyang mjal yul dang / bsnyun gzhi sogs gang nas brtags kyang yun ring mi bzhugs par thag chod pa lta bur snang bas/ da cha bdag cag rnams kyis rjes kyi bya ba ji ltar bgyi/ thugs dam la yun ji tsam bzhugs/ slar yang bdag cag 'gro ba rnams kyi mgon du sprul pa'i 'dzum zhal myur du ston pa dang / bdag cag 'khor dang bcas pa rnams kyang tshe rabs kun tu rjes su 'dzin par gsol ba btab pas/ gsung sgros gsung pa la shin tu sku bsnyel ba zhig 'dug na'ang thugs rus kyi rnam pas/ nged kyis de sngon e wa~M pa'i bstan pa 'di shin tu dar ba zhig byung na snyam nas mchog sprul thams cad mkhyen pa 'jam pa'i dbyangs mkhyen brtse'i dbang po e wa~M du gdan drangs pa sogs byas pa yin cing / de la brten nas bstan pa cung zhig dar bar gyur na'ang / snyigs dus su song bas ha cang bstan pa dar zhing rgyas pa zhig mi yong 'dug /da cha e waM pa'i bstan pa 'di khyod kyi lag tu bzhag pa yin pas sgo du ma nas dar ba'i thabs gang drag byed dgos tshul rgyu mtshan dang bcas pa dang / de sngon nged rang gi tshe la dkon mchog la mchod pa dang / dge 'dun la bsnyen bkur ba