[A:326]sgo nas mchog gi grong khyer du gshegs te rdo rje 'dzin pa'i ye shes kyi sku mngon sum mdzad par gdon mi za'o/ /sngar tshes bcu bzhi'i nyin bdag la gnas khang 'dir lam dus dang gtor bsngo zhag bdun gyis zhes bka' stsal pa'i zhag bdun yang tshes nyi shu'i nyin rdzogs 'gro bar snang bas/ de'ang ma 'ongs lung ston pa'i gsung du mngon no/ /de nas sgrub thabs rin chen 'bar ba las/ rang nyid lha yi rnal 'byor las/ /bdud rtsi 'khyil ba bzlas pa yi/ /dri zhim chu yis dang por bkru/ /rnam snang mdzad du de bsams nas/ /zhes gsungs pa ltar tshes nyi shu'i nub mo dang / tshes nyer gcig gi tho rangs bcas su bdag cag kha shas kyis dpal kye rdo rje bdag gi rnal 'byor sngon du 'gro ba'i sgo nas/ las thams cad pa'i bum pa tshul bzhin du bsgrubs shing / de nas tshes nyer gcig gi nyi ma rtse shar tsam na sku gdung rin po cher na bza' bzang po dang bcas te bzhugs khri'i khar bzhugs su gsol nas/ dad pa can thams cad la mjal kha btang ste gsol ba dang smon lam 'debs su bcug pa dang / de nas grwa pa kha cig gis gzim chung gzhan zhig tu dpal kye rdo rje'i dkyil 'khor gyi thig btab cing / bdag cag kha shas kyis nyi dros phyi ma tsam na 'jig rten kun gyi mchod sdong bla na med pa'i sku gdung rin po cher gong du bsgrubs pa'i bum pa'i chus sku khrus legs par gsol zhing / de nas kyang ji skad du dpal kye rdo rje'i rtsa ba'i rgyud rgyas pa las/ sku gsung thugs kyi rig sngags gdags/ /rang gi lha'am gzhan yang rung / /snying po snying gar gdags par bya/ /khrus kyis dag byas bdud rtsis byug /ces 'byung ngo zhes slob dpon bram ze nag po zhabs kyi gzhung las gsungs pa ltar sku gsung thugs