[A:337] skabs skabs su bkra shis pa'i ri mo'i dbyibs lta bur 'bar ba dang / khyad par dri bzang pos dgon pa'i gling thams cad la khyab pas skye bo mtha' dag ngo mtshar ba'i gnas la bkod par gyur to/ /de nyin mkhan rin po che khri thog pa'i mdun du gser zangs las grub pa'i ston pa'i sku dang / phyag ting dngul thag can/ rgya rol che legs cha/ zangs bum dngul kham kha rgyan dang bcas pa/ dngul gyi ting phor bdun tshar/ gos chen ser po gser Tam can gyi sku stod/ gos chen gser Tam gyis mtha' lcags byas pa'i sku gzan/ mgo snam gyi zhabs chags 'ja' chen/ phying khra/ ljon ja 'khor drug gnyis/ 'bras dkar ltang bcas phul ba dang / de byings thams cad la'ang rnam gzhag dang / yon 'bul la sogs pa'i bsnyen bkur zab par bgyis so/ /de nas mchod pa dang bcas te zhag bdun song ba'i mthar gdung khang zhal phye ba na gdung rus ni phal che ba zla ba ltar dkar ba dang / mthing shun ltar sngo ba'ang re gnyis tsam snang la/ gang ltar yang gdung rus nyung tsam zhig las mi snang bas thams cad yid mi ches pa lta bur byung pa ni/ ring bsrel dang bcas pa'i gdung ngo mtshar ba rnams bdag cag skal ba dman pa rnams kyi bsod nams kyis mi 'chun par mthong nas dpa' bo dang mkha' 'gro ma rnams kyis spyan drangs par gdon mi za'o/ /gang ltar yang rgyud sde rnams nas ji ltar bshad pa bzhin gyis gdung rus rnams btus te/ dpal kye rdo rje'i sgo nas bsgrubs pa'i bum chu dang / dge slong brgyad tsam gyi kun rig gi sgo nas bum pa tshul bzhin du bsgrubs pa'i chus yang dang yang du sku khrus gsol zhing / slar gdung rus zhib par 'dur te rin po che'i phye ma dang / dri zhim pos sprus pa'i