[A:152]byon pa'i lugs gnyis kyi shes bya thams cad la blo gros gsal zhing / ngo tsha dang khrel yod kyis brgyan pa/ dad pa dang phan sems che ba la sogs pa ya rabs kyi yon tan mang pos mdzes par spud pa padma bu khrid ces bya ba de yin la/ de la sras drug dang sras mo lnga ste bcu gcig tsam yod pa las/ sras thams cad kyi thog mar gyur pa ni bdag cag gi dpal ldan bla ma dam pa yon tan rin po che'i phung por gyur pa 'di yin la/ de'i 'og ma ni khyim la gnas shing phan sems kyi me tog bkra ba padma sum legs zhes bya ba dang / de'i 'og ma ni bdag cag gi bla ma mkhas dang grub pa yongs kyi gtsug rgyan rnal 'byor 'jam dpal bzang po'i zhal snga nas dang / de'i 'og ma ni bsod nams dang dbang thang gi ljon pa rgyas shing / mkhyen rab kyi lo 'dab yongs su grol ba mdzod pa nor ldan shes rab bzang po pa dang / de'i 'og ma ni khyim pa'i brtul zhugs 'dzin pa rgyal po tshe ring zhes bya ba dang / de 'og sras thams cad kyi tha chung du gyur pa ni dran dbang gi me long rab tu gsal ba rje drung bzang po blo gros su grags pa'o/ /de lta bu'i sras rnams kyi thog mar gyur pa bdag cag gi dpal ldan bla ma dam pa nges pa don gyi rdo rje 'chang chen po 'di ni dang po yum gyi lhums su zhugs pa'i tshe'ang ngo mtshar ba'i ltas mang du byung zhing / de nas ji srid phyir ma btsas kyi bar du yum la rmi ltas bzang zhing / lus shing bal gyi 'dab ma ltar yang ba dang / zo mdog rgyas pa dang / khyim gyi 'byor pa 'phel ba la sogs pa dge zhing bkra shis pa'i ltas mang po mngon sum du byung bar gyur la/ de nas zla grangs rdzogs te rab byung bcu gsum pa'i nang gses 'phags pa'i yul na du rmu kha zhes pa bod skad du gdong ngan te ljongs 'dir dbang thang dang bstun pa'i ming me pho spre'u'i lor/ yum la gnod pa med cing ngo mtshar ba'i ltas mang po dang bcas